Lokalizohet vendi ku është fshehur ekstremisti Konstandin Kaçifa, i cili sulmoi me armë automjetin e policisë në Bularat të Gjirokastrës. Mësohet se ai ndodhet i fshehur pranë Depos së Ujit në Bularat. Shqiptari ka tre karikatorë me vete dhe po bën rezistencë ndaj RENEA-s, duke qëlluar sërish me armë.
FNSH dhe RENEA kanë rrethuar zonën ku ndodhet Kaçifa, i cili nga të dhënat paraprake mësohet se është njeriu i trupave speciale të ushtrisë greke.
Sulmi ndaj policisë ndodhi pikërisht sot në festën e Greqisë, ku 35-vjeçari ka shtënë me armë por fatmirësisht nuk ka pasur të lënduar.
Banorët e Bularatit thonë se Kaçifa jeton në Greqi dhe se kishte disa ditë që kishte ardhur në Bularat. Ata i përshkruajnë të shtënat si momente tmerri, raporton Top Channel. Megjithëse gjesti është kryer spontanisht, disa prej banorëve dyshojnë që i riu duhet ta ketë planifikuar më parë sulmin.
Ishte pikërisht Kostandin Kaçifa, ai që dekoroi një ditë më parë të gjithë fshatin me flamuj grekë. Pyetjes së një bashkëfshatari, se përse flamujt kishin pozicion “zije”, Kaçifa i dha përgjigje kaotike.
“Unë i dëgjova të shtënat nga brenda dhe dola. Nuk kuptova kë qëllonte. Ishte si luftë. Ende na dridhet trupi. Nuk e prisnim fare këtë gjë. Dukej sikur kishte humbur mendjen në moment. Nuk kemi pasur kurrë gjëra të tilla”, tha një banore për TCH.
“Ne ishim përgatitur për festë. Nuk e kuptuam pse ndodhi kjo, por ishte tmerr. Fat që nuk u vra njeri. Dëgjova që u tha burrave që ishin në oborrin e kafenesë ‘futuni brenda’ dhe kaq. Ne e njohim për djalë të mirë e të urtë. Nuk e besoj që e ka bërë këtë”, tha një tjetër banore.
