Ish-ministri i Drejtësisë, Ylli Manjani e ka cilësuar si mashtrimin më të madh premtimin e Ramës për mbylljen e lojërave të fatit.
Madje, Manjani ka treguar edhe “planin” e qeverisë, ndërsa tha se ajo ka në plan që t’i ‘kruajë’ xhepat e shqiptarëve.
I ftuar në studion e Ora News, ish-ministri tha se Rama nuk i mbyll dot lojërat e fatit, por do ua japë licencën kompanive që këto lojëra të luhen online me celular, IPad apo kompjuter.
“Kjo është gënjeshtra më e madhe që kam dëgjuar nga goja e kryeministrit. Është një fenomen që ka ekzistuar dhe ekziston. Nuk e mbyll dot, do t’i heqë nga dyqani dhe do i vërë në celularë. Ka licencuar kompani për të luajtur në telefon, në Ipad apo në kompjuter. Kjo do të përhapet, do të jetë e ngjashme me një skenë të re piramidale. Do t’i kruajë njerëzit nga xhepat. Këtë po bën Edi Rama. Njerëzit janë në një prag super mashtrimi”, ka thënë Manjani. TIRANA TODAY
