Emërimi i Sandër Lleshit krijoi një ngërç politik në vend e një krisje mes Presidencës dhe Kryeministrisë, përplasje kjo më e ashpra që nga vendosja e Ilir Metës në krye të Shtetit.
Presidenti publikoi sot 14 pyetjet drejtuar Ministrisë së Mbrojtjes lidhur me figurën e Sandër Lleshit, duke treguar edhe arsyen e mosdekretimit të tij si ministër i Brendshëm.
Por, në një nga pyetjet drejtuar ministres Olta Xhaçka, vihet re që Meta është ‘kapur’ edhe me mbiemrin e zëvendës ministrit të Brendshëm.
Kështu, në pyetjen e 14-të, Presidenti pyet:
“Në kërkesën e Kryeministrit propozohet që z. Sandër Lleshaj të emërohet ministër i Brendshëm. Ndërkohë konstatohet se në vendimet gjyqësore mbi këtë ushtarak, të dhënat personale të tij paraqiten me mbiemër Lleshi.
Lutemi sqarimin e këtij fakti, kur janë bërë këto ndryshime në të dhënat personale dhe si është reflektuar kjo në dosjen personale të këtij ushtaraku?”
Së fundmi, Lleshaj hoqi dorë nga karriera ushtarake duke i kërkuar në një letër presidentit Meta që ta dekretojë si ministër të Brendshëm.
