Kryeprokurori Llalla, nisur nga hetimet e fundit që kanë ardhur nga shteti italian, tha se trafiku i drogës drejt Italisë është bërë në mbështetjen e individëvë që kanë për detyrë goditjen e krimit.
Llalla tha se kur hetohen zyrtarët e lartë, politika tenton të ndërhyjë tek prokurorët, duke iu referuar kështu rastit të dosjes “Habilaj” për të cilën kërkohet edhe arrestimi i ish-minstrit të Brendshëm, Saimir Tahiri.
Po ashtu, ai i dha një mesazh politikës shqiptare, teksa tha se prokurorët janë të pavarur dhe askush s’mund t’u ndërhyjë atyre në çështjet që kanë.
FJALA E LLALLËS:
Hetimet e antimafies italiane së fundmi kanë siguruar të dhëna se grupe kriminale shqiptare kanë trafikuar drejt Italisë, tonelata lëndë narkotike kanabis dhe në shumë raste kjo është realizuar me mbështetjen e individëve që kanë për detyrë goditjen e këtij krimi të rëndë.
Institucionet duhet të bëjnë punën e tyre, pasi faktet flasin se këto institucione më së paku nuk kanë përmbushur detyrimet e tyre.
Kjo është gjendja aktuale dhe situata nuk është më e mira e mundshme. Institucionet shqiptare sipas detyrave të përcaktuara nga kompetenca e tyre ligjore duhet të jenë më efikas në veprimet në terren. Këtu e kam fjalën edhe për ato institucione e kanë për detyrë parandalimin, mbledhjen e informacionit, identifikimin dhe referimin e tyre, si të individëve edhe të grupeve kriminale që kultivojnë dhe trafikojnë lëndë narkotike.
Gjithashtu është e rëndësishme të sigurohet një kontroll më i rreptë i vijës kufitare me mjete që ka në përdorim me qëllim zbulimin në kohë të rasteve të trafikut të lëndëve narkotike.
Çdo prokuror është pavarur dhe i zoti i çështjes. Askush s’mund të ndërhyjë në çështjen e tij, përfshi dhe mua!
