Liverpool nuk ndalet, mposht Tottenhamin në “Wembley” dhe në 5 ndeshjet e para të Premier League ka marrë 5 fitore. Një start fantastik për “The Reds” të drejtuar nga Jurgen Klopp, të cilët gjetën golin e parë që në minutat e para, por që anulohet nga arbitri anësor.
Të besuarit e Pochettinos zhvillojnë një lojë të kujdesshme dhe përpiqen të shfrytëzojnë kundërsulmet, por kjo lojë nuk rezultoi aspak efektive pasi Liverpool dominon. Goli i avantazhit për vizitorët ka ardhur në minutën e 39’ falë Georginio Wijnaldum. Holandezi përfiton nga një rrëmujë në zonë gjatë goditjes së këndit duke goditur topin me kokë i cili kalon vijën fatale megjithëse portieri vendas tenton ta nxjerrë jashtë.
Në fillimin e pjesës së dytë Liverpool nuk e ul aspak ritmin, por kur nuk ishin plotësuar 10’ minuta lojë gjen golin e dytë me Roberto Firmino. Braziliani shënon një nga golat më të thjeshtë në karrierë, pasi ishte i vetëm në vijën e portës kur topin nuk e largon dot as portieri as mbrojtja e Tottenham.
Ndeshja nuk e humbi interesin pasi të dyja skuadrat vazhduan të sulmonin por të shënuar më shumë gola. Dhe Lamela i jep shpresë ekipit të tij me një gol në minutën e 92′ teksa kishin mbetur edhe tre minuta lojë. Shumë pak për Tottenham që të shënojë edhe një tjetër dhe duhet të pajtohet me humbjen e dytë radhazi.
