Një foshnjë elefanti vetëm njëmuajshe është gjetur e lidhur me një litarë në kyçin e këmbës në Tajlandën lindore, i cili dyshohet të jetë sulmuar nga gjahtarët. Ai kishte pësuar plagë të tmerrshme dhe nuk dihet prej sa kohësh qëndronte aty. Aq fort ishte lidhur litari në kyçin e këmbës saqë ia kishte dëmtuar lëkurën dhe i dukej kocka.
Nuk dihet se sa kohë elefantit, i pagëzuar Baitong, kishte qenë i lidhur aty pa qumështin e nënës, por ishte aq i dobët sa mezi qëndronte në këmbë. Të vegjlit e elefantëve janë krejtësisht të varur nga nënat e tyre për ushqim derisa të jenë rreth dy vjeç. Ndërsa nuk dihet as fati i nënës së Baitong.
Baitong u shpëtua më 18 dhjetor, por pavarësisht përkujdesjes së madhe dhe mjekimit intensiv të këmbës së infektuar, vdiq të premten. Prasarn Buangsook, një veterinar nga Byroja e Menaxhimit të Zonës së Konservimit, tha: “Këmba e Baitong ishte e dëmtuar thellë deri në kockat. Ishte plagosur rëndë dhe ishte i dobët, sepse ai nuk kishte ngrënë asgjë për ditë me radhë.
Lëkura e këmbës ishte e gjitha e kalbur dhe kockat kishim marrë një dëmtim të pashërueshëm. Duhet që ti pritej këmba për të ndaluar shpërndarjen e infeksionit.”,
Buangsook tha se kishin vënë re se ai po fillonte ngadalë të rimëkëmbet. Por të enjten e kaluar, Baitong po luante me disa nga kujdestarët kur gjendja e tij papritmas u përkeqësua dhe u rrëzua në tokë. Banorët u përpoqën gjatë gjithë natës për ta përmirësuar gjendjen e Baitong, por ai vdiq të premten në mëngjes.
Nathanong Panpech, një nga veterinerët, tha: “Nivelet e oksigjenit të gjakut të Baitong ishin shumë të ulëta, duke shkaktuar një nivel të lartë të acidit në gjak. Ne i dhamë atij një infuzion, ilaçe dhe oksigjen, por nuk mund ta përballonte më.
Ne jemi të gjithë shumë të trishtuar për këtë humbje. Shpresoj se vdekja e Baitong do t’u kujtojë të gjithë gjahtarëve se kafshët janë të pafajshme dhe nuk e meritojnë fare këtë.”
Përshtati TIRANA TODAY
