Duket se Lista Serbe nuk ka ndërmend të ndryshojë qëndrim për sa i përket votimit të marrëveshjes së Demarkacionit.
Kjo parti ka mohuar të gjitha insinuatat rreth pazareve të mundshme të deputetëve të saj në lidhje me ratifikimin e marrëveshjes së demarkacionit me Malin e Zi.
Këtë qëndrim, Lista Serbe e bëri të ditur përmes një komunikate për media, ku thuhej se “tema për demarkacionin për ta nuk ekziston dhe me këtë duhet të merren partitë shqiptare në bazë të programit të tyre politik”:
“Për Listën Serbe tema e ashtuquajtur për demarkacionin absolutisht nuk ekziston. Kjo çështje nuk na intereson, ndërsa me të le të merren partitë shqiptare në kuadër të programit të tyre politik. Lista Serbe nuk dëshiron ta shantazhojë askënd, mirëpo as nuk do të lejojë të shantazhohet, prandaj kërkon nga partnerët e koalicionit raport korrekt, si dhe respektimin e marrëveshjeve politike të cilat janë bazë për funksionimin e koalicionit në pushtet.
Ne nuk duam të jemi të instrumentalizuar në asnjë mënyrë, dhe as që kemi qëllim të devijojmë nga parimet tona politike, në bazë të të cilave është formuar kjo parti, si garanci e të drejtave të popullit serb në Kosovë”, thuhet në komunikatë.
