Media shqiptare vitin e fundit është akuzuar shumë se po përdoret nga politika dhe po censurohet. Akuzat më të forta i bëjnë vetë politikanët, si nga mazhoranca por dhe nga pozita, duke ofenduar mediat dhe duke i akuzuar se janë në shërbim të interesave të caktuara.
Indeksi i lirisë së shtypit i vitit 2017, i reporterëve pa kufij e rendit vendin tonë të 76-tin në botë, ndër 180 vende, në të njëjtin pozicion si një vit më parë, dhe po me 29.92 pikë të grumbulluara.
Progresi i vitit të kaluar, kur Shqipëria fitonte 6 pozicione në renditje, duket se tashmë është ndalur.
Sa i përket vendeve fqinje, Shqipëria sipas reporterëve pa kufij ka një liri shtypi më të vogël se Bosnje-Hercegovina apo Serbia, por një liri më të madhe se Maqedonia, Mali i Zi, Kosova apo edhe Greqia.
Maqedonia renditet e 111-ta, Mali i Zi i 106-ti, Greqia e 88-ta dhe Kosova e 82-ta.
Bosnje-Hercegovina dhe Serbia renditen në vendin e 65-të dhe 66-të respektivisht.
Në rang global ndërkohë, spikasin vendet europiane, që mbajnë edhe pesë pozicionet e para në listë, me Norvegjinë, Suedinë, Finlandën, Danimarkën dhe Holandën. Belgjika dhe Islanda mbyllin dhjetëshen e parë.
Në vend të fundit qëndron Koreja e Veriut.
