Sabien Lilaj dhe Frederik Veseli janë shfaqur para kamerave në Antalya për të përcjellë një prononcim për mediat. Situata në grumbullimin e kombëtares duket shumë pozitive dhe lojtarët janë të kënaqur që anë pasur më shumë kohë për të përgatitur ndeshje. Kjo u ka dhenë mundësinë të njihen më mirë me trajnerin dhe me shokët e skuadrës. Përballë Turqisë nuk do të jetë thjeshtë një miqësore, do të zbritet në fushë për të dhenë maksimumin e për ta fituar ndeshjen, por lojtarët janë të vetëdijshëm që kanë përballë një kundërshtar të fortë.
Sabien Lilaj
Sabien Lilaj është grumbulluar për herë të pare me kombëtaren që nga momenti që drejtimin e saj e mori Panucci, ai është shprehur mjaft i lumtur, po ashtu ka fjalë të mira edhe për trajnerin që p e provon atë në pozicionin që ndjehet më mirë.
“Jam i kënaqur që grumbullohem sërish pas një kohe të gjatë. Është kënaqësi gjithnjë të veshësh fanellën kuqezi. Besoj se gjatë kësaj jave jam përgatitur mirë dhe kam dhënë maksimumin dhe shpresoj që nesër të kem disa minuta. Në çdo ndeshje duhet të futemi për të marrë maksimumin e pikëve pavarësisht se si përfundon ndeshje. Kemi përballë një kundërshtar të fortë, por nuk do futemi për barazim. Do japim më të mirën tonë dhe pse të mos dalim me fitore. Pozicioni im është para mbrojtjes, aty ndihem mirë, i njëjti rol që po luaj edhe te Skënderbeu. Edhe trajneri te ai rol më ka provuar, ndaj ndihem mirë.”
Po ashtu Lilaj ka prekur edhe situatën e mirë që po kalon Skënderbeu këtë sezon. Por nuk ka preferuar të ndalet tek kundërshtarët, pasi i intereson vetëm që ekipi i tij të fitojë.
“Para se të vija këtu nuk kisha kontaktuar asnjëherë. E takova për herë të parë këtu. Nuk është e thënë të kesh kontakte të mëdha me trajnerin. E rëndësishme është që kur vjen këtu të japësh maksimumin dhe ai të ngelet i kënaqur. Këtë sezon e kemi nisur mjaft mirë, kemi marrë thuajse pikët maksimale, por asnjë ekip nuk mban të njëjtin ritëm gjatë gjithë sezonit. Besoj se edhe ne do të kemi oscilacione, por shpresojmë të ndodhin sa më vonë. Nuk dua të ndalem shumë te kundërshtarët, mjafton që Skënderbeu të ecë mirë”,-përfundoi Lilaj.
Frederik Veseli
Frederik Vesli është shprehur optimist që me kaq kohë në dispozicion për të përgatitur një ndeshje mund të marrim maksimumin. Është e nevojshme që ne të njihemi me njëri tjetrin dhe të kemi një afrimitet më të madh me trajnerin, kjo do të na bashkojë më shumë.
“Është ndeshje shumë e rëndësishme. Kemi pasur një javë të plotë për ta përgatitur dhe nuk besoj se ekzistojnë ndeshjet miqësore. Duhet të japim maksimumin për të bërë sa më mirë. Normal që kundërshtari është i fortë dhe duhet të jemi të kujdesshëm. Në grumbullimet e kaluara kemi pasur pak kohë për stërvitje, ndërsa këtë javë kemi bërë shumë punë të mirë. Jemi bashkuar edhe si grup dhe kemi pasur një shans për të njohur trajnerin pak më shumë.”
Veseli është duke kaluar një fortë mjaft të mirë tek ekipi i Empolit, ku është një titullarë i padiskutueshëm. Gjatë verës që lamë pas ka pasur disa oferta të rëndësishme për lojtarin në fjalë, por presidenti i Empolit nuk e lejoi diçka të tillë dhe bëri çmos që Veseli të qëndronte në ekip.
“Në aspektin personal gjërat janë mirë. Jam në fushë rregullisht për 90 minuta në çdo ndeshje dhe rezultatet kanë qenë të mira, por kemi pasur disa humbje dhe shpresoj të kthehemi sërish në formë dhe të ngjitemi në Serinë A. Ka pasur gjatë merkatos së verës disa oferta nga Seria A dhe nga jashtë Italisë, por presidenti i klubit nuk më la të largohesha, bëri çmos që të qëndroja aty. Më zgjati edhe kontratën në klub dhe shpreson që të ngjitemi në Serinë A bashkë me mua, ose nëse bëjmë një kampionat të mirë të më shesë në merkaton tjetër”,-përfundoi Veseli.
