Prokurori i Përgjithshëm, Adriatik Llalla, zhvilloi një takim me drejtuesit e prokurorive të të gjithë niveleve, ku u diskutua mbi ecurinë e procesit të vlerësimit profesional të prokurorëve, në kuadër të ligjit të Vetingut.
Në bazë të ligjit “Për rivlerësimin kalimtar të gjyqtarëve dhe prokurorëve”, Prokuroria e Përgjithshme ka detyrimin ligjor që të mbështesë Komisionin e Vetingut për përmbushjen e një prej tre komponentëve të rivlerësimit të prokurorëve, i cili është aspekti profesional.
Pas kërkesës së Llallës, u ra dakord që deri më 29.09.2017 të përfundojë vlerësimi profesional në kuadër të ligjit të Vetingut për prokurorët kandidatë për Këshillin e Lartë të Prokurorisë, si edhe për anëtarët prokurorë të Këshillit të Emërimeve në Drejtësi.
Ndërkohë, po vijon puna për përfundimin e rivlerësimit profesional të prokurorëve në Prokurorinë e Përgjithshme dhe të drejtuesve lokalë të prokurorive në nivel Rrethi dhe Apeli, ndërsa më tej procesi vijon me rivlerësimin profesional për të gjithë prokurorët e Republikës së Shqipërisë.
Raportet e vlerësimit paraprak profesional do të hartohen nga një komision i posaçëm dhe do t’i vihen në dispozicion Komisionit të Vetingut, i cili do të ndjekë procedurat e mëtejshme të përcaktuara në ligj.
