Ervis Iljazaj ka komentuar zhvillimet politike në vend. Drejtori i gazetës “Mapo” ka qenë i ftuar në studion e “Top Talk”, ku ka folur mbi miratimin e ndryshimit të lojërave të fatit.
Iljazi ka kritikuar qëndrimin e opozitës, e cila ka deklaruar se “nuk i beson Edi Ramës për këtë çështje”:
“Nuk i besoj Ramës, nuk mund të jetë qëndrim politik. Qëndrim politik do të thotë që ti ke një alternativë, je dakord ose dhe paraqet një alternativë tënden”.
Më tej, ai ka kritikuar edhe nismën e qeverisë, të cilën e konsideron si të nxituar dhe radikale:
“S’e kuptoj se si një politikë e tillë, të një sektori të madh të industrisë shqiptare, të mendohet, të hartohet dhe të kthehet në ligj për një javë. Si ka mundësi, nuk u pyetën fare operatorët e sektorit. Nuk u bë një studim se ku do shkojnë të punësuarit në këtë sektor. Nuk u paraqit asnjë studim”, sqaron Iljazaj.
Vendimi i qeverisë sipas tij vjen pasi politika ka nevojë për konsensus të përhershëm, e në këtë fushë e gjen diçka të tillë. Por kjo sipas tij nuk mund të trajtohet në këtë mënyrë.
