Parlamenti maqedonas ka miratuar dje një projektligj që e bën gjuhën shqipe gjuhën e dytë zyrtare të vendit, mes kritikave të ashpra nga opozita konservatore.
Implementimi i ligjit për gjuhët, në fazën e ardhshme, do të kërkojë punësimin e disa përkthyesve. Por, duket se qeveria maqedonase nuk parashikon një buxhet për çështjen në fjalë.
Kështu, kryeministri Zoran Zaev është shprehur se për momentin nuk flitet për punësime të reja dhe se për këtë qëllim, do të shfrytëzohen fillimisht në maksimum administratorët që “me vite marrin rrogën pa bërë asgjë”.
“Do t’i shfrytëzojmë resurset të cilat ekzistojnë në administratën publike. Bëhet fjalë për trup përkthyes, i cili do t’i ndihmojë për përdorimin ose përparimin e ligjit për gjuhët dhe janë në funksion të zbatimit praktik te gjuhëve. Nuk kemi planifikuar punësime të reja në këtë pjesë , shkojmë me plotësimin e vendeve të zbrazëta në administratë dhe besoj se ju e dini që ka një numër të madh të administratorëve të cilët marrin rroga, por qëndrojnë në shtëpi. Këto resurse të shtetit mundemi ta shfrytëzojmë maksimalisht dhe racionalisht në të gjitha aspektet për përdorim normal si në atë ligjvënës, por edhe të jetesës në Maqedoni”, tha Zaev.
