Lideri politik i Hamasit Khaled Mashaal, ka deklaruar për një media turke se grupi terrorist Gaza është gati për një armëpushim, por nuk ka marrë një përgjigje nga Izraeli.
Lajmin e ka bërë të ditur The Times of Israel, teksa pritet një konfirmim nga autoritetet në lidhje me këtë çështje.
Ndërkohë, po ditën e sotme, kryeministri i Izraelit Benjamin Netanyahu deklaroi se nuk do të ndalen sulmet e vendit të tij në Gaza, teksa shtoi se asgjë nuk ka mbaruar.
“Ata sulmuan kryeqytetin tonë, ata qëlluan me raketa në qytetet tona. Ata po paguajnë dhe do të vazhdojnë të paguajnë shtrenjtë për këtë. Nuk ka mbaruar akoma”, tha ai pas konsultimeve të sigurisë në selinë e ushtrisë në Tel Aviv.
Konflikti mes Palestinës dhe Izraelit vijon të përshkallëzohet. Izraeli ka dërguar 7 mijë ushtarë, tanke dhe armatime për të sulmuar palestinezët e Hamas që ndodhen në Gaza.
Përplasjet kanë nisur që prej të hënës dhe deri më tani bilanci është 119 viktima, mes tyre 31 fëmijë dhe 830 të plagosur.
