Autori i një libri, të publikuar së fundmi lidhur me Shtëpinë e Bardhi thotë se presidenti Trump ka ndoshta “besueshmërinë më të ulët se çdo njeri që ka arritur në këtë pikë”.
Michael Wolff, i cili kaloi disa muaj në Shtëpinë e Bardhë teksa investigonte, iu përgjigj kritikave të presidentit se libri ishte i mbushur “plot gënjeshtra”.
Wolff tha për NBC se i gjithë stafi i Trump thotë se ai “është si një fëmijë”. Libri ka dalë në shitje, ndërsa ka pasur radhë të gjata pritje për ta blerë atë.
Avokatët e Trump u përpoqën që ta ndalonin botimin e librit “Zjarr dhe Stuhi: Brenda Shtëpisë së Bardhë të Trump”, duke pretenduar se përmbante shumë gënjeshtra.
Por autori Wolff tha se presidenti kishte më pak besueshmëri se çdo njeri tjetër që ka arritur në këtë pikë, ndërsa e cilësoi Trumpin si një njeri që nuk lexon dhe që nuk dëgjon dhe që ka nevojë për argëtime të menjëhershme.
Libri citon ish-ndihmësin më të lartë, Steve Bannon duke përshkruar një takim në Trump Toëer në Nju Jork midis një avokati rus dhe zyrtarëve të fushatës zgjedhore të Trump, duke përfshirë edhe djalin e presidentit, si një “tradhtar”.
Por Donald Trump dhe i biri i tij mohojnë fuqishëm të ketë ndodhur ndonjë bashkëpunim.
Po ashtu, libri gjithashtu e portretizon Trumpin si të befasuar pas fitores së presidencës.
Wolff tha se ishte “e jashtëzakonshme” që presidenti i SHBA-ve do të përpiqej të ndalonte botimin e librit të tij, një lëvizje që as “CEO i një kompanie të mesme” nuk do ta ndërmerrte.
Nga ana tjetër, Trump tha se nuk i kishte dhënë Wolff qasje në Shtëpinë e Bardhë dhe as nuk i kishte folur atij për librin.
Wolff u përgjigj: “Çfarë po bëja atje nëse ai nuk donte që unë të isha atje? Unë absolutisht që fola me presidentin.”
I pyetur nëse përpjekjet për të bllokuar botimin e librit kishin ndihmuar shitjet, ai buzëqeshi dhe tha: “Ku duhet të dërgoj kutinë e çokollatave?”
Libri thuhet se bazohet në më shumë se 200 intervista, por disa fragmente janë kritikuar dhe janë vënë në pikëpyetje.
Megjithatë, edhe nëse vetëm gjysma e asaj që përmban libri është e vërtetë, ajo ngjan me një portret të ndezur të një presidenti paranojak dhe një Shtëpia të Bardhë Kaotike, thotë redaktori i BBC North America, Jon Sopel. Përshtati TIRANA TODAY
