Emisioni “BOOM” në RTV Ora News iu rikthye edhe njëherë problemit të transportit të invalidëve.
Librezat e invaliditetit vazhojnë të mos njihen sërish nga shoqeritë e transportit publik dhe privat në kryeqytet.
Invalidët në çdo udhëtim që bëjnë në linjën interurbane Tiranë-Ndroq janë të detyruar të paguajnë biletën e udhëtimit prej 500 lekësh të vjetra.
Edhe pse kanë një status dhe një ligj që detyron shoqëritë e transportit publip dhe privat që invalidët të mos paguajnë biletë, ata e shkelin këtë ligj duke iu marrë invalidëve lekët e biletës ose i detyrojnë ata të zbresin në rast mospagimi të saj.
E njëjta situatë paraqitet edhe në linjën interurbane Tiranë-Bërxull, e cila nuk njeh në mënyrë kategorike librezat e invaliditetit, dhe detyron këta të fundit të paguajnë me para biletën.
Kryetari i Shoqatës së Invalidëve të Punës, Abdulla Omuri e cilëson absurditet mosnjohjen e librezave për sa kohë kjo kategori e përfiton udhëtimin falas me ligj.
Emisioni “BOOM” u interesua tek Shoqata Kombetare e Transportit Qytetas e cila thotë se kjo situatë është krijuar për shkak të moskompensimit sipas ligjit të shoqërive të transportit nga ana e shtetit.
