Shoqata Kongresi i Bashkimit dhe agjencia e lajmeve INA kanë rikativizuar kërkesën për hapjen e Konsullatës Shqiptare në Manastir pas 10 vitesh.
Kërkesa i drejtohet presidentit të Shqipërisë, Ilir Meta i cili do të qëndrojë në Manastir me rastin e 22 Nëntorit – Ditës së Alfabetit.
Kërkesa do të dorëzohet nga gazetari dhe themeluesi i kësaj shoqate, Fërgim Demiri, i cili thotë se për 10 vite kjo kërkesë hasi në veshë të shurdhër, që në kohën kur president ishte Bamir Topi.
“Kërkesën ia dorëzuam presidentit Bamir Topi dhe se përgjigja ishte se do të shqyrtohet ajo, por deri sot asgjë nuk u bë. Ministria e Jashtme atëkohë u arsyetua se nuk mund të përballojë funksionimin e konsullatës”, thekson gazetari Fërgim Demiri.
Derisa kërkesa është bërë atëkohë, Ministria e Jashtme e Maqedonisë hapi konsullatën e saj vite më parë në Durrës, me iniciativën e organizatës Ilinden, ndërsa Konsull nderi është emëruar Aleksandër Pilo, raporton INA.
Në qytetin e Manastirit të njohur si qyteti i konsujve janë rreth 12 konsullata, përfshirë atë ruse, greke dhe të disa shteteve të tjera evropiane.
