Lazio nuk arrin të marrë më shumë se një barazim 1-1 përballë Fiorentinës në “Olympico”. Pas humbjes në derbi pritej një reagim nga lacilaët, që të fitonin ndeshjen dhe të mos lejonin një shkëputje më të madhe nga Roma dhe Juventusi. Ka qenë një ndeshje e luftuar shumë fort nga të dyja ekipet, që kanë shpërdoruar shumë raste për shënim. Por gjithçka në fund u vendos nga teknologjia VAR, e cila vendosi një 11-metërsh në favor të Fiorentinës.
Pjesa e parë kishte një Lazio shumë agresiv që kërkonte të shënonte dhe ia del mjaft mirë në minutën e 25’, me anë të qendërmbrojtësit De Vrij. Ky i fundit arrin të shënojë me anë të një goditje me kokë, ku topi vjen pas ekzekutimit të një goditje dënimi nga Luis Alberto. Të dy ekipet kishin raste të arta për të shënuar sërish gol në pjesën e parë por nuk ia dalin dot.
Fiorentina e Piolit në të dytën zbret në fushë më e qartë dhe kërkon me ngulm të gjejë rrugën e rrjetës. Violat mbajnë shumë në presion Lazion, por një super Strakosha bën që topi të mos përfundojë në rrjetë. Në minutat e fundit portieri i kombëtares shqiptare realizon një pritje spektakolare, pas një roveshate të Chiesa. Por në fundin e takimit një ndërhyrje e gabuar e Caicedos në zonë dhe pas vëzhgimit në sistemin VAR, arbitri vendos që është penallti. Merret përsipër të ekzekutohet nga Babacar dhe shndërrohet në gol.
Një barazim mjaft i hidhur për Lazion, e cila kishte mundësinë të përfitonte nga barazimi që kishte marrë Roma përballë Genoas. Lazio mbetet në kuotën e 29 pikëve në vendin e pestë, ndërsa Fiorentina shkon në kuotën e 18 pikëve në vendin e 11.
