Liverpool pas finales së Champions League është hedhur seriozisht në sulm për një portier të ri. “The Reds” janë të sigurt se gardiani i ri i portës së tyre do të jetë Thomas Strakosha. Madje, mediat pranë klubit legjendar anglez besojnë se marrëveshja për transferimin e gardianit shqiptar është fare pranë.
Nga ana tjetër është edhe Lazio që ka dhënë sinjale të mundshme për një largim të Strakoshës, pasi janë pranë mbylljes së marrëveshjes për portierin veteran të Olympiacosit, Silvio Proto, me belgun që pritet të zbarkojë shumë shpejt në Romë.
Liverpool e sheh të pamundur që të sigurojë shërbimet e Alisson, portierit të Romës pasi ai vlen shumë, ndërsa për gardianin 23-vjeçar të kombëtares shqiptare do të mjaftonin vetëm 30 milionë euro. Marrëveshja me Lazion për Strakoshën do të ishte mjaft fitimprurëse për Liverpoolin, që më në fund do të afronin një portier të ri në moshë dhe që jep garanci, por mbi të gjitha pa u detyruar të bëjnë shpenzime të çmendura në merkato.
Megjithatë, finalistët e edicionit të kaluar në Champions janë të vetëdijshëm se duhet të nxitojnë për të mbyllur marrëveshjen, pas për kuqeziun interesohet edhe Bayer Leverkusen në Bundesligën gjermane, që kërkon zëvendësuesin e Bernd Leno që kaloi te Arsenali.
