Lisandro Lopez është lojtari më i ri i Interit. Mbrojtësi do të jetë të hënën në Milano për vizitat mjekësore. Ai do të kalojë te skuadra e Spaletit në formë huazimi, me të drejtën e blerjes në fund të sezonit për vlerën e 9 milionë euro. Benfika ka dhënë “ok”-in për këtë transferim. Lopez është 28 vjeç dhe ka nënshtetësinë argjentinase dhe atë spanjolle.
Drejtuesit i bëjnë kështu Spaletit dhuratë një mbrojtës qendre me më shumë përvojë se Bastoni. Tani Interi do të ketë një mbrojtje më të fortë. Në ndeshjet e fundit skuadra e Spaletit ka vuajtur shumë në mbrojtje dhe trajneri përdori me humor shprehjen: “Edhe nëna ime e kupton që na duhet një mbrojtës qendre”.
Interi ishte duke vlerësuar edhe një transferim tjetër të mundshëm të holandezit të Lazios, Stefan De Vrij, i cili deri dje konsiderohej i larguar nga lacialët. “Gazzetta dello Sport” hedh poshtë zërat për një largim të holandezit që i mbaron kontrata me Lazion në verën e ardhshme, pasi ai ka rënë dakord për një rinovim të saj deri në vitin 2021. Zyrtarizimi pritet të vijë gjatë ditës së hënë, ndërsa Interi dhe Juventusi duhet të tërhiqen nga gara për të siguruar shërbimet e holandezit.
