Ilir Latifi kërkon majën në UFC. Ai ka sfiduar sërish kampionin në fuqi në peshën “light-heavyweight”, Daniel Cormier. Përmes një postimi në Instagram Latifi sfidon kampionin duke i kërkuar një mundësi për të realizuar këtë përballje në kafaz.
Ndërkohë Cormier është shprehur se i kanë ngelur dhe dy ndeshje për të zhvilluar dhe më pas do të vari dorezat në gozhdë, pavarësisht se kohët e fundit ai ka pasur shumë luftëtar që e kanë sfiduar. I fundit është suedezi me origjinë shqiptare Ilir Latifi.
Latifi ka fituar 5 nga 6 ndeshjet e fundit në UFC dhe aktualisht është një nga luftëtarët më në formë të peshës “light-heavyweight”.
“Kampion, përse vazhdon të fshihesh. Unë jam kundërshtari i duhur ndaj të cilit duhet të mbrosh titullin. Nëse nuk do të ndeshesh me Alex, atëherë ndeshu me mua boll u fshehe kampion, më jep mundësinë time. Respekt,” ishin fjalët e Latifit në Instagram.
Daniel Cormier sapo ka mposhtur Stipe Miocic në peshën e rëndë dhe kërkon një ndeshje multi-milionë dollarë ndaj yllit të WWE, Brock Lesnar. Kjo nuk është hera e parë që Latifi e sfidon atë, pasi edhe pasi mori fitoren e fundit ai e sfidoi ballë për ballë , por kampioni nuk pranoi.
