Rreth 300 artistë janë mbledhur për të prezantuar përmes artit vlerat amerikane në Uashington. Ekspozita ka në qendër histori të imigrantëve dhe shërben si një deklaratë e fuqishme vizuale se larmia është një ndër faktorët e fuqisë së Shteteve të Bashkuara.
Strukturë banese e ndërtuar brenda galerisë në qendrën kulturore BlackRock, e mbuluar me 300 panele të krijuara nga 300 artistë. Secili nga panelet i kushtohet paraardhësve të artistit, që emigruan për në Shtetet e Bashkuara me ose pa dëshirën e tyre.
“Kemi gjashtë artistë, familjet e të cilëve erdhën këtu me anijen Mayflower që mbërriti në Masaçusets në 1620. Ekspozita mbulon të gjitha prurjet kryesore nga Evropa, Azia, Amerika e Jugut, Afrika e deri tek artistët që janë vetë të ardhur nga Lindja e Mesme para një apo dy vjetësh,” thotë Ellyn Weiss.
Ellyn Weiss është jo vetëm bashkorganizatore, por edhe artiste pjesëmarrëse dhe ia ka dedikuar punimin e saj gjyshit që u largua për t’i shpëtuar përndjekjes fetare në Rumani në 1900. Ai bleu një pronë për biznes në Filadelfia.
“Shoqata historike e Filadelfias konfirmon se ndërtesa e tij ishte një ndër ndalesat për Hekurudhën e Nëndheshme, një organizatë që ndihmonte skllevrit që shpëtonin nga pronarët në Jug, para Luftës Civile, M’u duk një histori shumë e bukur dhe shumë domethënëse për mënyrën se si përvojat tona në këtë vend janë të ndërlidhura”.
Projekti “One House” ishte ide e ArtWatch, një shoqatë e artistëve të zonës së Uashingtonit.
“Shoqata u krijuar rreth dy vjet më parë për të krijuar projekte që përdorin artin vizual si mënyrë për të dëshmuar vlerat dhe parimet e Amerikës: demokracinë, përfshirjen, unitetin, tolerancën. Ky është projekti më i madh që kemi bërë deri tani,” thotë zonja Weiss.
Artistët kanë prejardhje familjare nga e gjithë bota.
“Ne përfaqësojmë një shtrirje të madhe globale, njerëz që erdhën këtu për t’i shpëtuar përndjekjes, për të kërkuar një jetë më të mirë, për t’i shpëtuar varfërisë ekstreme,” thotë bashkorganizatorja Weiss.
Struktura përfshin panele edhe nga amerikanët indigjenë, artistë që e kanë prejardhjen nga banorët e hershëm që jetonin këtu edhe para mbërritjes së evropianëve.
Të tjerët rrëfejnë histori skllavërie:
“Kam pikturuar një pjesë të Afrikës, pasi e dimë pak a shumë se e kemi prejardhjen nga një zonë apo pjesë e caktuar e kontinentit. Pikturova edhe një pjesë të Shteteve të Bashkuara, zonën e Karolinës së Veriut, pasi kam zbuluar se kemi lidhje me këtë rajon. Megjithëse të parët tanë u sollën këtu kundër vullnetit të tyre, ne besojmë tek ideali i shpresës dhe mundësive,” thotë Shante Bullock.
Kyujin Lee ka interpretuar largimin nga Koreja e Jugut dhe mbërritjen në Amerikë:
“Për të përcjellë këtë ide, kam përdorur duart që thurin me shtiza fije të të ngatërruara dhe në këtë mënyrë simbolizoj largimin tim nga vendi për të ardhur këtu. Pastaj pjesa tjetër e punimit me shtiza simbolizon thurjen e një jete të re në atdheun tim të ri”.
Ekspozita shoqërohet edhe me regjistrime zanore dhe xhirime të artistëve duke rrëfyer historitë e tyre.
“Projekti mishëron një deklaratë të fuqishme se ne kemi ardhur në këtë vend nga e gjithë bota, por ne mbështesim njëri-tjetrin dhe larmia që përfaqësojmë përbën forcë,” thotë bashkorganizatorja e ekspozitës, Ellyn Weiss.
