Marketi ishte portieri që do të largonte padrejtësisht Etrit Berishën nga Lazio, për të parë gardianin shqiptar si të tepërt. Shtetësia italiane padyshim që e ndihmonte shumë në këtë aspekt, pasi Marketi linte për të dëshiruar me paraqitjet e bëra te Lazio, shpeshherë duke i kushtuar shumë skuadrës.
Megjithatë kur drejtuesit e klubit po mendonin për të larguar një portier, do të ishte Etrit Berisha që të bënte gati valixhet. Për të mbërritur më pas në momentin e Thomas Strakoshës, që përmbushi “hakmarrjen” për t’i treguar vendin Marketit. Në një prononcim për mediat italiane, ky i fundit u shpreh se rasti me Strakoshën i ka mësuar edhe rregullin bazë të futbollit:
“Kam kaluar 7 vite vërtet të lodhshme te Lazio, që kanë qenë me shumë luhatje, shumë të mira dhe shumë të dobëta. Pastaj ekipi vendosi t’i besonte një portieri të ri, Strakoshës. Kjo më bëri mua që të mësoj gjërat qartë sesi janë në futboll: mund të kalosh nga thelbësori i ekipit, në të tepërt”, ka thënë Marketi.
