Sekretari i Përgjithshëm i NATO-s, Jens Stoltenberg i ka kërkuar Rusisë që të tërheqë të gjitha forcat ruse nga Ukraina. Me qëllim për t’i dhënë fund njëherë e mirë mbështetjes së separatistëve në lindje të territorit ukrainas.
Gjatë një konference për mediat në Kiev, Stoltenberg tha se Moska duhet t’i kthejë tri anije ukrainase, të cilat i kishte kapur në Ngushticën e Kërçit, në nëntor të 2018.
Rusia pretendon se anijet ukrainase të kapura në Ngushticën e Kërçit kanë qenë në ujërat territorialë të Rusisë. Mirëpo këto deklarata janë hedhur poshtë nga Tribunali Ndërkombëtar për Ligjin e Detit, me seli në Hamburg.
“NATO-ja mbështet sovranitetin dhe integritetin territorial të Ukrainës dhe nuk e njeh aneksimin e Krimesë nga Rusia”, tha Stoltenberg.
Kreu i NATO-s i ka thënë presidentit të Ukrainës, Volodomyr Zelenskiy se marrëveshjet e paqes, duhet të zbatohen nga të dyja anët. Ndërsa shtoi se NATO mbështet përpjekjet e Zelenskiyt për ta zgjidhur në mënyrë paqësore këtë konflikt.
Po ashtu, Stoltenberg theksoi se NATO-ja planifikon të rrisë mbështetjen për Ukrainën dhe Detin e Zi, duke kryer stërvitje ushtarake në këtë rajon.
