Zbulohet ADN-ja e vrasësit të komisarit Artan Cuku. Policia ka arritur të zbulojë profilin gjenetik të ADN-së së autorit të vrasjes së kryer më 8 prill në Tiranë, ku mbeti i vrarë Artan Cuku.
Profili gjenetik i zbuluar nga provat biologjike të gjetura në vendin e krimit, do të përdoret në hetime duke e krahasuar me profilet gjenetike të personave që po hetohen në 3 pistat kryesore ku është orientuar policia: vrasje për hakmarrje, për shkak të biznesit dhe për shkak të detyrës si drejtor policie në Vlorë.
Gjithashtu, policia ka grumbulluar një numër të konsiderueshëm shenjash gishtash, por ato nuk e kanë ndihmuar hetimin. Kjo sepse në hollin e pallatit ku ndodhi ngjarja, para policisë kishin qenë edhe njerëz të tjerë, që kanë prekur dyert e ashensorit apo të derës së jashtme.
Policia ka publikuar edhe video të vrasësit të Cukut, filmuar nga kamerat e sigurisë pak momente para krimit, ndërsa ka kërkuar edhe ndihmën e qytetarëve për identifikimin e tij, gjë që do të jetë shumë më e thjeshtë me zbulimin e ADN-së së autorit.
