Laboratorët e drogës vijojnë të zbulohen njëri pas tjetrit. Këtë radhë, policia ka zbuluar një të tillë, në një shtëpi banimi 3-katëshe, në lagjen ‘Kastriot’ të qytetit të Fierit. Laboratori u gjend gjatë operacionit të koduar me emrin ‘‘Llamba’’. Në gjashtë dhoma, me një sipërfaqe prej 220 metra katror, rriteshin nëpërmjet llambave, bimët e kanabisit.
Policia thotë se u gjendën në vazo rreth 2800 fidanë, me lartësi nga 30 deri 80 cm. Brenda laboratorit u arrestuan në flagrancë 8 persona, 6 burra e 2 gra. Godina është në pronësi të një biznesmeni, i cili e kishte lënë atë me qira. Policia e Fierit sqaroi se faturat e larta të energjisë elektrike krijuan, fillimisht, dyshimin për praninë e një laboratori të mundshëm në lagjen “Kastriot”.
Policia arrestoi gjithashtu 2 punonjësit e OSHEE-së, Alesio Hajderaj dhe Ylli Kostandini, ndërsa është shpallur në kërkim personi me inicialet E.F., që posedonte laboratorin. Pas laboratorit të Skraparit dhe atij të Shkozës në Tiranë, ky i Fierit është i treti i sofistikuar, që zbulohet në harkun kohor të një jave.
