Pas largimit nga Real Madrid karriera e Cristiano Ronaldos ka filluar të ketë probleme të shumta. Më e rënda ishte akuza që erdhi nga një shtetase amerikane e cila e akuzoi se e kishte përdhunuar në vitin 2009, sapo ai kishte kaluar tek “Los Blancos”. Në aventurën e re tek Juventusi ylli portugez nuk ka pasur startin e dëshiruar dhe problemet në anën ligjore duket se e kanë çorientuar atë.
La Repubblica pretendon: Cristiano Ronaldo mendon se Real Madrid kërkon ta fundosë. Sipas gazetës italiane, marrëdhënia e Ronaldo-s me Los Blancos i thye përfundimisht gjatë dhjetorit të kaluar. Gjatë akuzave për evazion fiskal, presidenti i Real Madrid Florentino Perez refuzoi ta mbështeste yllin e ekipit, ndërkohë që portugezi mendonte se përgjegjës për gabimin e llogarive ka qenë vetë klubi.
Pikërisht ky distancim nga ana e drejtuesve madrilen ka qenë arsyeja kryesore që Ronaldo shkeli fjalën e dhënë se dëshironte që ta mbyllte karrierën si futbollist në Madrid dhe më pas gjatë verës u largua drejt Juventusit.
Por La Repubblica ka një teori të pabesueshme se Real Madrid kërkon t’i prishë imazhin, duke pretenduar se ky është mendimi i vetë Ronaldo-s. Sipas tyre, Ronaldo është i bindur se gjithçka që ka ndodhur, si mungesa e çmimeve personale, akuzat e përdhunimit, kartoni i kuq ndaj Valencia-s, sponsorët që po largohen, kanë ardhur nga klubi i Real Madrid.
