Super-hiti i kësaj vere, “Despacito” ka pasur popullaritet aq të madh, saqë ka ndikuar drejtpërdrejt në rritjen e turistëve.
Kështu, kërkesat e të huajve për të vizituar Porto Rikon janë rritur me më shumë se 45%.
Një rezultat i jashtëzakonshëm ky, vetëm falë një këngë, pasi turistët kanë kuriozitetin të prekin nga afër bukurinë autentike të kësaj cope “parajse”, e cila ndodhet në verilindje të Karaibeve, mes Republikës Dominikane dhe ishujve Virgjin.
“Prej kohësh, Porto Riko është një destinacion për pushime, por për shumë turistë është ende i panjohur. Ne dimë që kultura popullore ka një ndikim të madh në strategjitë tona të turizmit dhe duke qenë se Porto Riko është vendlindja e artistëve Luis Fonsi dhe Daddy Yankee, hiti Despacito, i suksesshëm në gjithë botën, duket se po nxit një numër në rritje turistësh të vijnë të vizitojnë këtë destinacion”, u shpreh Isabelle Pinson, zv.presidente e Hotels.com.
“Despacito” u publikua më 13 janar 2017 nga shtëpia diskografike Universal Music Latino, duke arritur menjëherë një sukses botëror.
Porto Riko është e pasur me vende interesante, si për shembull plazhet e bardha karaibike, kryeqytetin San Juan, me kështjella të kohës së kolonizimit spanjoll dhe Qytetin e vjetër, Observatorin Astronomik Arecibo dhe shpellat e Rio Camuy, që gjenden në një luginë të thellë në zemër të xhunglës.
Turistët që vendosin të eksplorojnë këtë vend të pasur me histori do të mbeten të magjepsur nga ndërthurja e përsosur mes natyrës dhe kulturës, nga ngjyrat e ndezura të shtëpive dhe plazheve.
