Lufta për karrigen e FSHF-së ka kaluar çdo kontekst sportiv, sepse dy nga tre kandidatët janë të “fortë” dhe me shpatulla të ngrohta.
Presidenti aktual, Armand Duka, po bën të pamundurën për të marrë mandatin e 5-të radhazi.
Bashkim Fino me përparësi të fortë e politikës dhe mbështetjen e vëllait të kryeministrit, Olsi Ramës, që mban postin e drejtorit Sportiv tek Partizani, futet ne garë për të rrëzuar dinastinë “Duka”.
Kandidati i tretë dhe më i pashpresi, vjen nga fusha e sportit, një is-arbitër në Itali, që nuk gjeti hapësirë të ushtronte profesionin në Shqipëri.
Karrigia e FSHF-së qarkullon shuma marramendëse parash dhe kjo ka bërë që dhe loja të bëhet e piste. Fino e ka përqendruar fushatën tek nxjerrja e skandaleve të Dukës në 16 vite qeverisje.
Bujë të madhe bënë “shoqatat fantazme”, të cilat janë avantazhi i Dukës nëse votojmë, por kjo çështje përfundoi në prokurori pas një kallëzimi penal të Flamurtarit.
Ikona të futbollit shqiptar tani janë në hetim. Abuzimi me fondet që menaxhohen nga Federata është një tjetër akuzë e rëndë.
Por ndërhyrja e aktorëve politikë në këto zgjedhje, përbaltën edhe sportin, argëtimin e vetëm që ka një vend. Por pse quhet argëtim për sportdashësit, kur këta te fundit i kane braktisur stadiumet.
Përballja e dy aktorëve kryesorë të kësaj gare, Duka-Fino, nxori në pah të palarat dhe dashurinë e tyre për futbollin. Të dy akuzuan njëri-tjetrin për mbështetje nga kriminelët dhe presione ndaj anëtarëve të Asamblesë për ti votuar ata.
“Bandat kriminale” do të vendosin fituesin e këtyre zgjedhjeve u shpreh një gazetar që ka braktisur Shqipërinë. Për të normalizuar situatën në Tiranë zbarkoi dhe një delegacion i UEFA-s, i kryesuar nga zv.presidenti Sukri, që është i akuzuar për një numër të madh skandalesh.
As UEFA nuk është e kulluar dhe këtë e kanë vërtetuar jo shumë kohë me parë. Bombën e radhës e shpërtheu edhe një ish-anëtar i KE-së, qe e quajti Dukën të mbytur nga skandalet dhe që vendos fatin e kampionatit shqiptar.
FSHF është një OJF dhe si e tillë duhet të drejtohet nga një njeri i përgjegjshëm dhe jo nga një biznesmen që e përdor për fitime personale, apo nga një politikan që mbahet mend për firmat piramidale.
Dy të fortët e kësaj gare nuk meritojnë të jenë në atë karrige, mos ndoshta është më mirë një alternativë e tretë, apo bojkoti i këtyre zgjedhjeve. Gjithsesi mbetet për tu parë spektakli që do të na dhurojnë tek “Hotel Adriatiku” të mërkurën.
Eno Leka, TIRANA TODAY
