Nga: Marsela Sinani
Në shoqërinë tonë maskiliste, femrat kanë faj edhe kur vriten prej burrave. Ato pështyhen, shahen, ia nxjerrin të shkuarën e zezë, madje e nxijnë edhe më shumë. Pas vrasjes fizike, është edhe ajo morale. Pa u varrosur ende, viktima nxirret si në një tabelë qitje, përgojohet e përgojohet në shkallë, dyqanet poshtë shtëpisë, e gratë e liga të lagjes nuk rrinë pa bërë thashetheme, të cilat i shtojnë një barrë edhe më të rëndë familjarëve, se çdo thotë bota.
Kjo është vrasja e dytë, duke e cilësuar pa më të voglën mëshirë, si një femër djallëzore, e cila manipuloi një burrë të martuar. Ne nuk dimë se çfarë vuajtjesh mund të ketë kaluar ajo vajzë, ajo grua, ajo nënë e shumë fëmijëve, por ne nuk rrimë pa e mallkuar, ndonëse kockat e saj treten në dhe.
Në dy rastet që tronditën mbarë opinionin publik, gratë duhet të ulnin kokën dhe mbyllnin gojën, por edhe policia i vrau duke mos bërë asgjë, e duke dredhur zinxhirin. Mos duhet vallë të heshtim e të pranojmë këtë realitet të trishtë? Gjeneza e gjithçkaje është eliminimi i vrasjes morale, e cila shërben si justifikim i vrasjes fizike. Për të na qartësuar me idetë, “Tirana Today” ka kontaktuar me psikologen Suareza Nakuçi.
Përse ndodhin këto vrasje?
“Të gjithë ne e dimë se jemi të predispozuar të mbajmë më shumë lëndime psikologjike se sa fizike, lëndime si dështimi, refuzimi ose vetmia. Këto lloj situatash munden të shkojnë edhe më keq nëse i injorojmë, dhe mund të na ndikojnë në jetën tonë dramatikisht. Në gjykimin tim, unë personalisht mendoj se në dy rastet e vrasjeve të ditës së premte kanë qenë elementët e sipërpërmendur që kanë ndikuar në marrjen e vendimit për të ekzekutuar dy femra. E kam thënë edhe më parë, niveli i ulët intelektual ka bërë që këto persona të kenë një profil të ulët emocional dhe të shëndetit mendor. Në rastin e Xhuljetës, vajzës së ndjerë, motivi i saktë përse ajo u vra akoma nuk na është servirur, por fakti mbetet aty, ajo nuk jeton më, lëndimi është një aspekt psikologjik, emocional i cili i patrajtuar, i pa shprehur, ai mund të të çoj në marrjen e akteve ekstreme. Vetmia është një tjetër aspekt i pa trajtuar, ajo krijon një plagë të thellë është e aftë të përzjej mendimet dhe sferën emocionale, dhe kështu një njeri i vetmuar (në këtë rast djali që kreu vrasjen) ka perceptuar sikur s’ka pas vëmendjen e askujt, elementi tjetër është refuzimi, askujt si pëlqen të jetë i refuzuar dhe në këtë rast vajza e ka refuzuar djalin. Për këtë është e rëndësishme ta bëjmë primar shëndetin psikologjik, jo të gjithë realisht janë të aftë të pranojnë dështimin, nëse mendja provon t’ju bindë se ju jeni i paaftë për të bërë diçka dhe ju e besoni atë në këtë rast djali ka bindur veten që nëse ai ka dështuar në “marrjen e zemrës së saj”, por ai s’mund të dështonte në mënyrë faktike për ta vrarë. Këshilla ime e vetme është; duhet të thyet çdo cikël negativ përpara se të fillojë. Për Xhaferrin dhe Xhuljetën, ky cikël kishte filluar, akush nuk e diti si t’a shmangi këtë tragjedi.
Ndërsa për rastin e zonjës, nënës së 6 fëmijëve që u vra nga bashkëshorti, ndjej pafundësisht keqardhje, pasi mund të ishte shmangur që në dhunimin e saj të parë, por siç e përmenda dhe më sipër, niveli i ulët intelektual të vë përballë sfidave kulturore se çfarë mendojnë të tjerët për një grua me shumë fëmijë, që është divorcuar, gjithmonë faktet na kanë treguar se mbi më të dobtit ushtrohet më shumë forcë dhe dhunë, problemet sociale vazhdojnë të mbeten kryqëzatat e këtyre grave”.
Përse gratë shkojnë pas burrave të martuar?
“Faktori social-ekonomik besoj se duhet të jetë faktori kryesor që çon këto vajza/gra në të tilla situata. Është shumë e vështirë kur ke probleme sociale apo ekonomike që të shohësh realitetin në sy, dhe këto vajza nuk munden t’ja dalin vetë, gjërat i fitojnë më shpejt duke qënë partnere me meshkuj me të mëdhenj, më potent dhe në nivel ekonomik më të lartë se vetë ato. Jo të gjithë kanë aftësinë t’ia dalin vetë, shumë njerëz funksionojnë poshtë potencialit që kanë për të pasur fasilitete të kësaj natyre. Dhe kur pala tjetër ndjen shfrytëzimin apo dhe daljen nga kontrrolli të situatës ndodhin këto lloj tragjedish”.
Përse mbahen të fshehta këto lidhje?
“Këto lidhje mbahen të fshehta, sigurisht për arsye të tradhtisë bashkëshortore që po ndodh në njërin prej çifteve, dhe për shkak të opinionit dhe gjykimit nga shoqëria”, shprehet psikologia.
Ato orë ishin orë makthi, tronditje si për familjen, por edhe për shoqërinë e të ndjerave. Nëse nuk keni mundësi për t’i ndihmuar sa janë gjallë, mos i vrisni me fjalë e lërini të prehen në paqe!
Tirana Today
