Mes 27 personave të arrestuar nga policia në kuadër të mega operacionit shtrirë në 12 qarqe, është edhe një sportist. Bëhet fjalë për Elis Gurin, mundësin nga Shkodra që është arrestuar për veprat penale të “Prodhimit dhe shitjes së narkotikëve” si dhe ”Trafikim i narkotikëve”. Pas vitit 2008, Elis Guri përfaqëson shtetin bullgar në mundje.
Mega operacioni i koduar “VOL-VO 4” është shtirë në 12 qytete nga Hasi deri në Sarandë dhe janë goditur anëtarë nga 4 grupe të skeduara kriminale, në kuadër të operacionit “Forca e Ligjit”.
Por, kush është Elis Guri, sportisti i arrestuar ditën e sotme?
Elis Guri ka lindur në Shkodër më 6 korrik 1983. Ai është një sportist shqiptar i mundjes klasike në peshën 96 kg. Suksesi i tij më i madh shënohet së pari në Kampionatin Europian që u zhvillua në Finlandë, ku Elis Guri shpallet fitues i medaljes së bronzit në peshën 96 kg.
Por dhe në Kampionatin Botëror 2007 Elis Guri klasifikohet i 7-ti në peshën 96 kg, duke fituar të drejtën e përfaqësimit me kualifikim në Lojërat Olimpike “Pekin 2008″.
Si pjesëmarrës për herë të parë në një olimpiadë, Guri renditet në vendin e 8-të, duke shënuar dhe rezultatin e dytë më të mirë të arritur nga kuqezinjtë tanë. Të tjera rezultate të Gurit mund të përmendin vendi i 7-të në Lojërat Mesdhetare “Almeria 2005″, medalje argjendi në turneu botëror Trofeu “Milone 2006″.
Pas vitit 2008, Elis Guri garon për Bullgarinë dhe me 13 shtator 2011 merr medaljen e arit në Kampionatin Botëror të Mundjes në kategorinë 96 kg.
