Në nga qytetet më të rrezikuara në vendin tonë nga fatkeqësitë natyrore, është Gjirokastra. Kështu ka deklaruar kreu i Emergjencave Civile, Haki Çako, në një takim në prefekturën e këtij qyteti.
Ky i fundit e cilësoi Gjirokastrën si një qytet me “pullë të kuqe” që nënkupton shkallë të lartë rrezikshmërie. Dy lagjet më të rrezikuara janë “Kodra e Shtufit” dhe “Cfakë”.
Një fond prej mbi 85 milionë lekësh është akorduar dhe pritet që të mundësojë nisjen e punimeve rehabilituese për një nga lagjet më të rrezikuara, “Kodra e Shtufit”.
“Gjirokastra është e rriskuar nga përmbytjet, edhe për shkak të infrastrukturës dhe sistemit, ndaj ka qenë në dritë të kuqe. Lagjja ‘Cfakë’ dhe ‘Kodra e shtufit’ janë dy zona problematike, që kërkojnë ndërhyrje të menjëhershme”, u shpreh ai.
Kryetarja e Bashkisë Zamira Rami, theksoi se Bashkia e Gjirokastrës është në zbatim të rekomandimeve të lëna nga Instituti i Gjeologjisë për marrjen e masave të menjëhershme që synojnë uljen e rrezikshmërisë në zonat më të rrezikuara.
“Jemi në zbatim të këtyre rekomandimeve të lëna nga Instituti i Gjeologjisë për ndërhyrje emergjente si në lagjen ‘Punëtore’ edhe te ‘Kodra e Shtufit’.
Po konsultohemi për një projekt rehabilitues në kodrën e lagjes ‘Cfakë’ dhe kalasë së Gjirokastrës që të garantohemi për problemet e këtyre fenomeneve natyrore”, u shpreh Rami.
Sipas Ramit, punimet në këtë kodër priten të fillojnë brenda këtij 10-ditëshi.
