Ndryshime vijnë në radhë të drejtimit të Hipotekave. Pas një konkursi të zhvilluar i emëruari në krye të Hipotekave do të jetë Elion Semanaj. Semanaj u prezantua pak më parë nga ministrja Etilda Gjonaj. Ndërsa nga kjo detyrë do të largohet Blerina Doracaj.
Blerina Doracaj u emërua në krye të Hipotekave në 20 korrik 2017, pas shkarkimit të drejtorit teknik Arjan Bylykbashi, i propozuar nga PD që nga marrëveshja Rama-Basha më 18 maj.
Por emri i Elion Semanaj, nuk është i panjohur pasi ai në vitin 2016, qenë dhe kandidat për kreun e KQZ . Në atë kohë ai ishte tërhequr nga gara.
Kush është Elion Semanaj
Në datë 15.05.2017, Z. Elion Semanaj, me Urdhër të Ministrit të Energjisë dhe Industrisë z.Damian Gjiknuri, u emërua përkohësisht Drejtor Ekzekutiv i Agjencisë Kombëtare të Burimeve Natyrore.
Jetëshkrimi i shkurtër i z. Elion Semanaj
Elion Semanaj lindi më 1 mars, 1977. Është diplomuar si jurist në Fakultetin e Drejtësisë, dega juridik, në Universitetin e Tiranës. Z. Semanaj ka një eksperiencë të gjatë në punë si jurist. Ai ka kryer detyrën e juristit në Autoritetin Portual, Durrës, për të vazhduar më tej, në Avokaturën e Përgjithshme të Shtetit. Z. Semanaj ka kryer funksionin si avokat ku ka përfaqësuar dhe mbrojtur në gjyq persona fizikë dhe juridikë apo konsulenca ligjore në fushën penale, civile, tregtare administrative, në hartim të kontratave dhe marrëveshjeve etj.
Nga muaji shtator i vitit 2013 e në vijim, z. Semanaj ka kryer detyrën e Zëvendësdrejtorit Ekzekutiv të Agjencisë Kombëtare të Burimeve Natyrore. TIRANA TODAY
