Djali i Enver Hoxhes, Sokoli zbulon prapaskena për vdekjen e Hysni Kapos. Në një intervistë për “Panoramën”, Sokoli teksa rrëfen bisedën më të atin për ketë vdekje. Ajo ishte cilësuar si e papritur. Sokoli zbulon dyshimet e Enver Hoxhës për atë që ndodhi. Sokoli tha se “babai më ka shprehur shqetësimin që dikujt i është dashur kjo vdekje, për të qenë aq e befasishme”. Sipas Sokolit, Ramiz Alia është shfaqur i buzëqeshur kur vdiq Hysni Kapo. Ai thotë së këtë e pohon bashkëshortja e Hysniut, Vitoja por dhe të gjithë punonjësit e ambasadës shqiptare në Francë ku ndërroi jetë Hysni Kapo.
“Unë dëshmoj për shqetësimet e babait, për mënyrën se si humbën një pas një këto figura të rëndësishme të regjimit. Hysni Kapo vdiq në 1979 në një klinikë në Paris. E shoqëronte gruaja e tij Vito dhe Llambi Ziçishti, ministër i Shëndetësisë. Me urdhër të babait për shqetësim të madh për diagnozën e Hysniut, u nisën dhe Ramiz Alia e Kadri Hazbiu. Nga vetë pohimet e Vitos, kam mësuar për buzëqeshjen e Ramiz Alisë, shqetësimin e Kadri Hazbiut dhe zhdukjen në Paris të ministrit të Shëndetësisë, Llambi Ziçishti. Për këtë qëndrim, e di që është kritikuar nga babai im për të mos hapur panik në popull. Këtë gjë Vito Kapo e përsërit në një intervistë në ‘94 por, çuditërisht, ajo nuk foli më për këtë pikë. Edhe pse ne, në botimet e 2004-s, e shtruam çështjen troç: pse nuk flet më Vito Kapo për Ramiz Alinë, siç foli në 1979 dhe siç foli në 1994?!”,- thotë ai.
Sipas Sokolit, Ramiz Alia është shfaqur i buzëqeshur kur vdiq Hysni Kapo. “Këtë e pohojnë, përveç Vitos, dhe të gjithë punonjësit e ambasadës”, thotë ai.
Madje sipas tij, Ramizi qeshte, pasi “i iku një pengesë në rrugën drejt kreut të shtetit”
“Hysniu ka qenë numri 2 në hierarkinë partiake. Pra, ishte binomi Enver –Mehmet që mbulonin partinë dhe kryeministrinë, por Hysniu brenda linjës së partisë ishte i dyti. Me vdekjen e Hysniut dhe me vdekjen më vonë të Enverit, së paku në këtë linjë do të mbetej Ramizi”- thote Sokoli në “Panorama”
Ai tregon se Enveri kishte më shumë afrimitet me Hysniun, por dhe me Mehmetin kishte marrëdhënie shumë të mira të respektit reciprok, por jo marrëdhënie të ngrohta familjare.
“Ka dashur Hysni Kapon, ndonëse i ka rezultuar shumë vonë politika nepotike e tij apo e së shoqes, pasi ai mbulonte kuadrin, që të zotëronte nën autoritetin e Enver Hoxhës gjithë strukturat e jetës së vendit. Hysni Kapo donte të forconte krahun e tij kundrejt Mehmet Shehut pas vdekjes së Enver Hoxhës”- thote Sokoli.
Ai tregon se vete Enveri i ka thënë se “priste për vetë diagnozën kancer në pankreas, por asnjëherë aq befasishëm”. Pra, sipas tij, “babai më ka shprehur shqetësimin që dikujt i është dashur kjo vdekje, për të qenë aq e befasishme”, por pa vene gishtin se kush mund te ishte ai.
