Eshtë e njohur që gjatë periudhës së komunizmit, CIA (Agjencia Qendrore e Inteligjencës), apo shërbimi sekret amerikan, punonte fort të kishte informacione për regjimin komunist të Enver Hoxhës, për linjën politike, për diplomacinë, ushtrinë, etj. Dihet gjithshtu se në kushtet e izolimit total, dhe kontrollit të qytetarëve shqiptarë nga Sigurimi i Shtetit, informacionet nga Shqipëria kanë qenë të pakta, kryesisht të marra nga të arratisurit jashtë vendit.
Porse në një dokument sekret të sajin, të datës 22 maj 1952, ku janë përfshirë të dhënat e siguruara nga marrja në pyetje e disa shqiptarëve, duket se CIA ka qenë e interesuar edhe për detaje nga më të hollësishmet, siç janë për shembull shkaqet për konfliktet në brendësi të familjeve.
Në faqen dy të këtij dokumenti që mban datën 17 maj 1952, dhe që cilësohet si “Memorandum” me subjekt “Shënime për gjendjen e përgjithsme në Shqipëri”, në pikën 4 shkruhet tekstualisht: “4. Në fshatin Konispol, Avni Malo dhe nëna e tij çdo ditë rrahin gruan e ish (?) sepse burri i saj nuk dëshiron të bëhet agjent i Sigurimit sikurse ata”. Origjinali në anglisht: “4. In the village of Konispol Avni Malo and his mother beat every day the wife of the former (?) because her husband does not want to become a Security agent like them”.
Më tej në pikën 1 thuhet se sipas dëshmisë së Zejnel Merxhanit nga fshati Konispol, të gjithë të internuarit e Kampit të Tepelenës janë liruar.
Në pikën 2 thuhet se në Beden të Kavajës dhe në fshatin Lekaj, gjatë verës së vitit 1951, në kanale punonin 880 të burgosur.
Në pikën 3 thuhet se në fshatin Aranitas në Mallakastër janë grumbulluar të gjitha familjet reaksionare nga zona të ndryshme.
Në pikën 5 thuhet se kreu i Komitetit Ekzekutiv të Kolonjës, Maliq Vodica, u jep urdhëra punëtorëve, se në rast se dikush ka në familje ndonjë të dënuar nga komunistët, të mos qajë në shtëpinë e vetë, pasi do të ketë pasoja, etj.
