Kombëtarja U-19 e Shqipërisë e drejtuar nga Erjon Bogdani ka zhvilluar ndeshjen e fundit zyrtare në vendin tonë. Kuqezinjtë e kanë mbyllur me humbje, pasi janë mposhtur nga Norvegjia me rezultatin e ngushtë 1-0. Këto janë eliminatoret e dyta pa marrë asnjë pikë, madje pa shënuar as një gol në tre ndeshje zyrtare.
Ndeshja u zhvillua në “Niko Dovana”, ku kuqezinjtë sërish nuk arrijnë të marrin një rezultat pozitiv. Kështu në minutën e 31` të takimit, skuadra e Norvegjisë ka një mundësi të shkëlqyer, që shfrytëzohet shumë mirë nga Erik Bothein, që tund rrjetën e kuqezinjve të vegjël duke i dhënë avantazhin skuadrës së tij.
Me rezultatin 0-1 do të mbyllej dhe ky takim i tretë për skuadrën Kombëtare U-19, që nuk shënon asnjë gol në këto eliminatore dhe për më tepër nuk merr asnjë pikë. Kështu pas përfundimit të ndeshjeve të sotme, kombëtarja U-19 e Norvegjisë dhe ajo e Ukrainës kualifikohen për në “Elite Round”, ndërsa Sllovakia edhe pse arriti të kishte pikë të barabarta me dy skuadrat e kualifikuara nuk shkoi më tej për shkak të golavarazhit.
