Mimi Kodheli, deputetja e zgjedhur e PS-së në Kukës ka vijuar turin e dëgjesave me banorët e fshatit Shtiqën.
Kodheli falendëroi banorët për mbështetjen në zgjedhje, si dhe u siguroi se do rrisë angazhimin e saj për të bërë më të mirën për këtë qark.
“Dijeni se votat që kemi marrë ketë herë, pavarësisht se kemi marrë vetëm një deputet, janë më të shumta se në çdo qark tjetër të Shqipërisë. Sigurisht të krahasuara në përqindje. Nuk më mbetet gjë tjetër vetëm t’ju them që më rritet detyrimi dhe angazhimi për të bërë më të mirën për qarkun edhe ky do të jetë një fillim i mirë për ta trasformuar herën tjetër komplet rezultatin edhe për ta afruar pushtetin lokal te pushteti qendror. Vijnë shumë shpejt zgjedhjet lokale dhe unë kuptoj që pushteti lokal nuk është atje ku duhet, madje nuk është gjëkundi, ka shkuar në drejtim të paditur me investimet e veta, të ashtuquajtura investime, nuk është pranë banorëve dhe nuk e di se si këta burra vijnë edhe rrinë përkrah këtyre deputetëve, të PD-së edhe kërkojnë të marrin votën nga ju, por ky është problem i tyre”, tha Kodheli.
Banorët treguan disa nga problemet që i shqetësojnë, si problemi i rrugëve, kanaleve kulluese, gropave septike etj.
Kodheli i sugjeroi kuksianët të jenë më të bashkuar dhe të ngrenë zërin në mënyrë të organizuar për problemet që kanë dhe të bëhen pjesë e mbledhjes së Këshillit Bashkiak. Më tej, deputetja e zgjedhur u dha një porosi banorëve: që të kishin kujdes me përdorimin e cigareve dhe të ishin më të ndërgjegjshëm në mënyrë që të shmangin vatrat e zjarrit.
