Kukësi harron “dhuratën” që i bëri Enea Jorgji, e shpall “non grata” (Video)

Kukësi u mposht 1-0 nga Kamza në “Zeqir Ymeri”, humbje e cila ka lënë një shije të hidhur tek kampionët në fuqi. Tekniku Pacult pas ndeshjes është shprehur se kjo situatë duhet analizuar në detaj, pasi nuk ishte vetëm fusha shkak i kësaj humbje. Por menjëherë pas ndeshjes KF Kukësi ka dalë në një deklaratë për mediat ku akuzon arbitrin e ndeshjes Enea Jorgjin, se tregoi njëanshmëri në këtë sfidë duke mbajtur anën e Kamzës. Duket se verilindorët e harruan shpejt ndeshjen e fituar përballë Skënderbeut po në atë stadium ku ishte pikërisht Enea Jorgji arbitri që “vrau” korçarët për të çuar titullin kampion në Kukës.

DEKLARATË PËR MEDIAT.

Humbja e sotme ndaj Kamzës do të analizohet në detaje nga stafi teknik dhe do nxirren përgjegjësitë e gjithsecilit.
Por Futboll Klub Kukësi, shpreh indinjatën dhe protestën ndaj gjykimit të njëanshëm të ndeshjes së luajtur sot në Kukës midis FK Kukësit dhe FK Kamzës, e vlefshme për javën e 19 të Kategorisë Superiore. Treshja e gjyqtarëve të kryesuar nga Enea Jorgji mbajti një gjykim aspak të drejtë dhe hapur në favor të Kamzës.
Ndërhyrjet e shumta ndaj lojtarëve tanë shpesh herë u toleruan dhe rasti më flagrant është ai i mosdhënies së penalltisë në minuten e 72, ku lojtari i Kamzës Frasheri, brenda zonës prek topin me dorë.
Kjo treshe gjyqtarësh kishin vetëm një qëllim, dëmtimin e Kukësit në këtë takim.
Futboll Klub Kukësi shpall “non grata”, gjyqtarin Enea Jorgji dhe do kërkojë në ditët në vazhdim nga Komisioni i Arbitrimit që ky gjyqtar të mos gjykojë ndeshjet e Kukësit.
Gjyqtarë të blerë nga skuadra e Kamzës, por dhe me ndihmën e FSHF bënë që të zhvillohej një teatër i shëmtuar sot në stadiumin “Zeqir Ymeri” të qyetetit të Kukësit.