Basha u kërkon anëtarëve të kryesisë së Partisë Demokratike që më parë se të shohin idetë e ndryshme brenda PD-së, të bashkohen në betejën ndaj “Rregjimi -Rama-Doshi”.
Nga burime brenda mbledhjes së kryesisë mësohet se, Basha është shprehur që brenda PD-së ka vend për të gjithë, por nuk mund të ketë vizione të ndryshme për vjedhjen e zgjedhjeve.
“ Në këtë parti ka vend për të gjithë, ka vend për idetë e gjithsecilit mbi mënyrën se si duhet çuar përpara beteja me regjimin Rama-Doshi. Megjithatë, kam bindjen dhe ndjesinë e fortë se nuk mund të kemi vizione të ndryshme mbi 25 prilllin. Sepse nëse zgjedhjet e 25 prillit janë një episod që do të mbulohet nga turpi në historinë e pluralizimit, nëse e kemi të qartë se 25 prilli ishte masakra më e madhe zgjedhore në historinë e pluralizimit, atëherë nuk mund të pranojmë që gishti duhet drejtuar në këtë sallë, përpara se ta drejtojmë te kundërshtari që kemi përballë. Përndryshe nuk bëjmë gjë tjetër veçse i japim një dorë kalçifikimit të antivlerave të ndërtuara me poshtërsi nga ata që kemi përballë, sipas të cilës hajduti quhet i suksesshëm dhe vjedhja fitore”, mësohet të ketë thënë Basha në mbledhje.
Sipas të njëjtave burime brenda kryesisë, mësohet se Basha u ka kërkuar anëtarëve të kryesisë që të bëhen bashkë për të mos lejuar atë që ai konsideron “përmbysje djallëzore vlerash”. “Unë besoj që Shqipëria ka nevojë për ndryshim dhe jo kurrë për një hajdut tjetër më të madh, apo një ortak me të zot të bandave dhe mafias”, mësohet të ketë thënë kreu i PD-së Lulzim Basha në mbledhjen e Kryesisë.
Përballja Kadilli-Basha
Pas fjalës së kreut të PD-së, drejtuar anëtarëve të kryesisë, mësohet se e ka marrë fjalën kandidati I vetëshpallur, Fatbardh Kadilli, i cili i ka kërkuar Bashës të tërhiqet nga kreu i PD-së. “Nuk je i pazëvendësueshëm”, mësohet t’i ketë thënë Kadilli Bashës, duke hapur kështu një debat që ka nisur menjëherë pas zgjedhjeve. “Je humbës i përsëritur për shkak të defekteve personale”, mësohet të ketë thënë Kadilli. Në cilësinë e anëtarit të kryesisë, Kadilli e bëri të qartë përpara mediave, pak minuta përpara mbledhjes, se do të kërkonte në kryesi që Basha të dorëhiqej. Kadilli tha se, ishte gati të përballej me të në rast zgjedhjesh. /Tirana Today/
