Në fillim të muajit dhjetor kryepokurorit Adriatik Llalla i mbaron mandati dhe duhet të lërë detyrën. Por, nga ana e tyre lidhur me këtë situatë, OPDAT dhe EURALIUS kanë dhënë rekomandime të qarta për çështjen në fjalë, për mënyrën se si do të veprohet në rastin konkret, kur përgjegjës për emërimin e tij është KLP-ja, e cila nuk është krijuar ende.
Një dokument i bërë publik nga BalkanWeb, flitet për sugjerimet konkrete të dy institucioneve të rëndësishme për mënyrën se si duhet të veprohet në rastin konkret.
Në dokument shkruhet qartë se ekzinson një dispozitë e qartë, që vendin e Llallës ta zërë një prokuror i përkohshëm,i cili duhet të zgjidhet me shumicë të thjeshtë. Për zgjidhjen e tij në Kuvend duhet të jenë gjysma e deputetëve. Sakaq, sipas dokumentit mandatin e kryeprokurorit aktual nuk mund ta zgjasë asnjë autoritet kushtetues pas skadimit.
“Në situatën që paraqitet këtu, duket se dispozitat kalimtare përcaktojnë të drejtën dhe detyrimin e Kuvendit të zgjedhë një prokuror të lartë, i cili i plotëson kërkesat e neneve 22 deri 27 të Ligjit, si prokuror i përkohshëm me shumicë të thjeshtë, në prani të më shumë se gjysmës së të gjithë anëtarëve të Kuvendit. Nuk ka autoritet kushtetues ose ligjor për Parlamentin që të zgjasë mandatin e Prokurorit të Përgjithshëm aktual, mbas skadimit të mandatit të tij. Përkundrazi, ekziston një dispozitë e qartë që urdhëron emërimin e një Prokurori të Përgjithshëm të përkohshëm”,- theksohet qartë në rekomandimet e OPDAT dhe EURALIUS.
