Kryeministri ukrainas: Rusia po përdor vaksinën për propagandë e ndikim politik

Kryeministri ukrainas Denys Shmyhal, tha se  Rusia po përpiqet të përdorë vaksinën e saj kundër COVID-19, “Sputnik V” për ta shtrirë ndikimin politik të territoret e Ukrainës Lindore dhe vendeve të tjera në Evropën Lindore.

Sipas tij,  besueshmëria e Bashkimit Evropian varet nga të qenurit në gjendje të ndihmojë vendet partnere si Ukraina që po luftojnë të marrin vaksinat e tyre.

“Është e rëndësishme të pranojmë se Federata Ruse po përpiqet në të vërtetë të imponojë vaksinën e saj të prodhuar në vend, veçanërisht si një mjet për të ndikuar në disa prej atyre rajoneve, veçanërisht ato që nuk kontrollohen aktualisht nga qeveria e Ukrainës. Dhe ky është rasti jo vetëm këtu, por edhe në shumë vende të Evropës Lindore”, tha Shmyhal në një intervistë për Politiko.

Ukraina po mbështet në programin e COVAX, e cila synon të garantojë qasje të barabartë në vaksinat dhe trajtimet e koronavirusit në të gjithë botën, për të paktën 8 milion doza të vaksinave, por kjo është ende larg nevojave të vendit.

Të hënën, Presidentja e Komisionit Evropian Ursula von der Leyen premtoi se vendet e BE do të ndihmojnë Ukrainën. BE-ja  kishte ndarë 190 milionë euro grante për Ukrainën për të ndihmuar në luftën kundër pandemisë COVID-19, vitin e kaluar.