Edi Rama ka zhvilluar sot një takim me Prokurorin e Përgjithshëm, Adriatik Llalla, me kërkesën e kryeministrit.
Takimi vjen pas kërkesës së Partisë Demokratike drejtuar Prokurorisë së Përgjithshme për verifikimin e së shkuarës të deputetit Aqif Rakipi.
Në këtë kërkesë, PD shkruante se Rakipi rezulton person me të shkuar kriminale në Itali.
Ndërkohë, Prokuroria e Përgjithshme ka zbardhur takimin mes kryeministrit Rama dhe Kryeprokurorit Llalla, ku shkruan se në fokus të takimit ishte diskutimi mbi kërkesën e subjektit politik, Partia Demokratike, lidhur me verifikimin e thelluar në kuadër të ligjit të njohur si “Për Dekriminalizimin”, për deputetin e Kuvendit të Shqipërisë, Aqif Rakipi.
Llalla vuri në dijeni Kryeministrin se Prokuroria e Përgjithshme ka nisur verifikimin e thelluar ndaj deputetit Aqif Rakipi disa muaj më parë. Procedura e verifikimit për këtë subjekt është ende në zhvillim, pasi Sektori i Posaçëm për “Dekriminalizimin” në Prokurorinë e Përgjithshme është ende në pritje të përgjigjeve nga ana e disa prej autoriteteve të huaja, të cilave u është kërkuar informacion.
Gjithashtu, Prokurori i Përgjithshëm theksoi se po vijon bashkëpunimi me autoritetet e tjera që kanë për detyrë verifikimin paraprak të subjekteve të ligjit “Për Dekriminalizimin”, ku veçoi Komisionin Qendror të Zgjedhjeve (KQZ), si institucioni që kryen përpunimin paraprak të personave të zgjedhur në pushtetin qendror dhe lokal.
