Kryeministri Edi Rama ka sqaruar deklaratën e tij bërë pak ditë më parë në lidhje me një reportazh të bërë nga një gazetare italiane në Bulqizë, për fëmijët që shfaqen duke mbledhur krom.
Duke kujtuar fjalët e Dritëro Agollit, “liria është armë, armët jepen me leje”, kreu i qeverisë shton se “dikur armën e lirisë partia e jepte me leje bazuar në disa kritere, por sot këtë armë, Kushtetuta ja jep çdo qytetari”.
“Mënyra sesi transportohet fakti në sytë e qytetarit duke e shpërdoruar, është një gjuajtje në ajër”, tha Rama në lidhje me reportazhin. I ftuar në “Studio e Hapur” në “News 24”, kreu i qeverisë ka kërkuar falje për mënyrën sesi është shprehur.
“Unë nuk e kam parë vetë, më thanë të tjerët. Unë pa e parë fola me një paragjykim dhe kam bërë gabim, pa dashje në rastin në fjalë”, tha ai.
” Më erdhi inat me ca italianë se dhe atje kazanë sa të duash ka. Kishin bërë një reportazh të ndyrë për Bulqizën më filmime të vjetra, me fëmijët që turreshin për të mbledhur krom. Faktikisht sot nuk është më si fenomen. Ka raste sporadike, por nuk është më. Po ishin filmime të vjetra mo… edhe e nxjerrin atje: “Ja Shqipëria, turren… tmerr. Tmerr. Çfarë të thuash!”, ishte reagimi i kryeministrit pas publikimit të reportazhit.
