Pas videos live të publikuar nga kryeministri Rama, i cili inspektoi sot kantierin e konvikteve të Inxhinierisë së Ndërtimit dhe disa prej rezidencave, vjen reagimi i kryetares së LSI-së.
Kjo e fundit ka dalë gjithashtu në një transmetim të drejtpërdrejt, teksa akuzoi Ramën se mashtroi qytetarët.
Sipas Kryemadhit, Rama në të vërtetë nuk ndodhej live, por ekipi i tij i propogandës po transmetonte një kronikë të regjistruar më parë.
Më tej, deputetja e LSI-së u shpreh se Rama mashtroi shqiptarët kur thoshte se investimet për rikonstruksionin e këtyre godinave janë të qeverisë shqiptare, pasi sipas saj, bëhet fjalë për një projekt të nisur në vitin 2011 dhe që financohet nga qeveria gjermane.
Deklarata e Kryemadhit
Jam e detyruar të bëj këtë transmetim live, nga sapo pamë transmetimin live të kryeministrit tonë mashtrues, i cili përveçëse vazhdon dhe mashtron duhet demaskuar në çdo sekondë. E para njëherë ai sot shpërndan një video ku thotë që investimi është projekti i qeverisë shqiptare, gënjen. Ja ku është tabela, që nuk është projekti i qeverisë shqiptare, por është projekti i qeverisë gjermane.
Mbasi falsifikoi firmën e Sekretarit të Shtetit në Amerikë tashmë po vjedh edhe projektet e qeverisë gjermane. Ky është projekt i vitit 2011 dhe duhet të kishte mbaruar në 20 dhjetor të 2018 dhe akoma nuk ka mbaruar. Por nuk mjafton kjo, por vjen edhe bën show mediatik për të treguar që po mbaron sa më shpejt. Po të kishte fytyrë dhe mundësi që ky njeri të vinte, le të vinte dhe të ballafaqohej me studentët kur ishte për tu ballafaquar, kur ishin studentët, jo që sot që studentët janë kthyer te familjarët e tyre.
Ai duhet të kujtojë dhe të shkojë në atë godinë ku vajzës i ra tavani mbi tokë, duhet të shkojë në ato godina ku për 400 vajza ka 4 banjo, që është akoma më e tmerrshme. Ai duhet të heqi dorë nga mashtrimet, të mos ti gënjejë shqiptarët, por të tërheqi projektvendimin për uljen e tatimeve për oligarkët, dhe 1/3 e atyre parave që ja u ka falur oligarkëve ditën e enjte me një seance plenare të falsifikuar tja u japi studentëve, jo vetëm për përgjysmimin e tarifave, por edhe për të krijuar kushtet normale dhe njerëzore për studentët.
Të lutem shumë Edi Rama mos vazhdo të gënjesh më, mos vazhdo të mashtrosh. Nuk do të ndahem më, këmba këmbës mbas çdo mashtrimi tënd, për të demaskuar dhe për të denoncuar para shqiptarëve. Për ta denoncuar përpara shqiptarëve. Iku koha kur mund të falsifikoje, ku mund të mashtroje. Falsifikove firmën sekretarit të shtetit, nuk ke për të falsifikuar më asgjë për vjedhjet që bën në Shqipëri”, tha Kryemadhi.
