Presidenti i Turqisë, Recep T. Erdogan edhe sot ka vazhduar bisedimet telefonike të nisura ditën e djeshme me qëllim uljen e tensioneve dhe gjetjen e një zgjidhjeje mes vendeve të Gadishullit Arabik.
Referuar burimeve zyrtare mësohet se presidenti Erdogan në lidhje me zgjidhjen e krizës në Katar ka zhvilluar biseda telefonike me presidentin francez Emmanuel Macron, presidentin indonezian Joko Widodo, Mbretin e Bahreinit Hamad bin İsa El Halife, Mbretin Abdullah II të Jordanisë, kryeministrin e Libanit Saad Hariri dhe kryeministrin e Malajzisë Nexhip Tun Abdurrezzak, raportojnë mediat vendase.
Erdogan ka theksuar se çështje të tilla të nxehta nevojiten të zgjidhen me dialog dhe është shprehur se Turqia është e gatshme të ofrojë çdo lloj kontributi për uljen e tensioneve. Ai mohoi zërat se Katari ka financuar organizata terroriste dhe i quajti këto akuza si shpifje që bëhen në lojën e madhe në luftën kundër terrorizmit.
“Nëse do të kishte diçka të tillë, unë do të isha i pari që do të dilja kundër Katarit. Këtu po luhet një lloj loje tjetër. Por se cili fshihet pas kësaj loje akoma nuk e kemi zbuluar. Bota e Lindjes së Mesme është mjaft e trazuar dhe nuk ka më nevojë për gjetje të tilla. Kjo krizë nuk i shërben askujt. Turqia do të vazhdojë zgjerimin e marrëdhënieve me Katarin dhe dialogun për zgjidhjen e krizës”.
Kujtojmë se presidenti Erdogan ditën e djeshme në lidhje me këtë çështje zhvilloi biseda telefonike me Emirin e Katarit sheikun Temim bin Hamad El Sani, presidentin e Rusisë Vladimir Putin, emirin e Kuvajtit sheikun Sabah El Ahmed El Sabah dhe mbretin e Arabisë Saudite Selman bin Abdulaziz El Suud.
