Logoja zyrtare e 10-vjetorit të pavarësisë së Kosovës është komentuar shumë, për shkak të pamjes së saj.
Ajo është një logo jo fort e qartë, teksa disave u ngjan me diellin, të tjerëve si shqiponjë apo krahë të ndarë shqiponje, ndërsa për të tjerë nuk simbolizon aspak rrugëtimit e 10-vjetorit të pavarësisë.
Ishte ish-kryetari i Kuvendit, Jakup Krasniqi, ai që tha se në logo nuk ka ndonjë simbolikë të rrugëtimit që na solli deri te ky jubile:
“Nuk shoh ndonjë simbolikë të rrugëtimit të Lëvizjes Kombëtare për Çlirim e Bashkim, rrugëtim gati njëshekullor i popullit tonë. Nuk shoh asnjë element e simbolikë të flijimeve për liri e pavarësi, të cilat falë gatishmërisë atdhetare të brezave, jemi në liri e pavarësi. Nuk shoh asnjë grimë grilash, pas të cilave shqiptarët kaluan mbi 600 shekuj burg. Nuk shoh asnjë simbolikë të kombit, madje asnjë ngjyrim elementar. Përkundrazi,shoh vetëm dy duar që kundërshtojnë njëra-tjetrën, sikur duan të thonë: Shikoni, këtë jubile e keni dhuratë vetëm nga këto dy duar të vetme, të cilat ua kanë sjellë Lirinë e Pavarësisë!”, ka deklaruar Krasniqi.
Këto deklarata kanë sjellë edhe reagimin zyrtar të Presidencës, e cila shprehet se nuk ka dashur të komentojë këto deklarime me arsyetimin se duan të qëndrojnë larg komenteve politike, por që nuk kanë ngurruar të tregojnë kuptimin e logos.
“Logoja është derivat i simboleve zyrtare shtetërore, ngjyrave zyrtare, por natyrisht që e ka edhe simbolikën e vet. Pjesë përbërëse e logos është ngjyra e kaltër, ngjyra e artë dhe e bardha, të cilat janë edhe ngjyrat e flamurit tonë shtetëror. Forma e logos, me dy duar të hapura dhe dhjetë gishta, përveçse nënkupton ditëlindjen e dhjetë të shtetit tonë, nënkupton edhe 10 vjet kontribut në paqen rajonale dhe si formë i ngjan edhe fishekzjarreve të cilët janë sinonim i festave kudo në botë. Në formën e logos ka elemente edhe të hartës së Kosovës dhe formës së saj, por ideatorët e kanë përfshirë edhe formën e yllit polar. Gjashtë yjet që në flamurin tonë shtetëror simbolizojnë gjashtë grupimet etnike më të mëdha që jetojnë në Kosovë janë paraqitur si gjashtë rreze ndriçuese për rreth logos, derisa dy vijat vertikale në mes të logos janë cepe të skajshme të hartës sonë”, ka deklaruar për “Kosova Press”, Adil Behramaj, këshilltari politik i Thaçit.
Organizimet për këtë manifestim tashmë kanë filluar dhe zyrtarë të Presidencës, që janë edhe pjesë e Këshillit Organizativ, kanë treguar se festa e pavarësisë sivjet do të zgjas 10 ditë, nga data 8 deri më 18 shkurt, si simbolikë e 10 vjetorit të pavarësisë.
