Brenda një viti, krimi është rritur ndjeshëm në vendin tonë. Instituti i Statistikave ka publikuar raportin “Statistikat e krimeve” për tremujorin e tretë të 2017-ës.
Vetëm brenda tre muajsh janë kryer 9.900 vepra penale, ç’ka nënkupton se në një ditë janë kryer mesatarisht 110 vepra penale, në periudhën e tre mujorit të tretë të 2017-ës.
Krahasuar me të njëjtën periudhë të 2016-ës, rezulton se numri i veprave penale është rritur me 10,3%.
Po ashtu, kemi edhe një rritje drastike të numrit të autorëve të veprave penale, teksa në tremujorin e tretë të këtij viti janë regjistruar 10.068 autorë të veprave penale, të cilët janë 23,8% më shumë krahasuar me tremujorin e tretë 2016.
Por, cilat krime zënë pjesën më të madhe të veprave penale?
Sipas INSTAT, pjesën më të madhe të veprave penale e zënë “Krimet kundër pasurisë dhe në sferën ekonomike” me 40,3%, më pas “Krimet kundër autoritetit të shtetit” me 38,3%, dhe “Krimet kundër personit” me 19,0%.
Vepra penale kundër personit
Gjatë tremujorit të tretë 2017 janë kryer 1.884 vepra penale kundër personit, duke pësuar rritje me 5,5%, në krahasim me tremujorin e tretë 2016.
Numri i autorëve të krimeve kundër personit, në këtë periudhë është 2.212 dhe përbën 22,0% të totalit të autorëve. Gjatë tremujorit të tretë 2017, numri i autorëve të kësaj vepre penale është rritur me 8,5%, në krahasim me të njëjtën periudhë të vitit të kaluar.
Vepra penale kundër pasurisë dhe në sferën ekonomike
Në tremujorin e tretë 2017 janë kryer 3.993 vepra penale “Krime kundër pasurisë dhe në sferën ekonomike”, duke pësuar rritje me 46,8%, krahasuar me tremujorin e tretë 2016.
Autorët e tyre janë 3.506, rreth 53,6 % më shumë se në të njëjtën tremujor të një viti më parë dhe përbëjnë 34,8% të totalit. Në këto vepra penale, Vjedhjet e pasurisë zënë 36,4% të totalit. Krahasuar me tremujorin e tretë 2016, gjatë këtij tremujori vjedhjet e pasurisë kanë pësuar rritje me 3,3%.
Veprat penale kundër autoritetit të shtetit
Në tremujorin e tretë 2017 janë kryer 3.798 vepra penale, me një rënie prej 12,4%, në krahasim me tremujorin e tretë 2016.
Numri i autorëve gjatë tremujorit të tretë 2017, është 4.093, duke shënuar një rritje me 12,7%, në krahasim me të njëjtën periudhë të vitit të kaluar.
Veprat penale kundër rendit dhe sigurisë publike, përbëjnë përqindjen më të madhe të veprave kundër autoritetit të shtetit, me rreth 78,7 %, duke regjistruar një ulje prej 19,6%, në krahasim me të njëjtën periudhë të një viti më parë.
Masat e sigurisë
Gjatë tremujorit të tretë 2017, numërohen 10.068 masa sigurie për autorë të veprave penale, nga 8.129 që ishin në të njëjtën periudhë të një viti më parë, duke pësuar rritje me 23,9%.
