Një krim i rëndë brenda familjes ka ndodhur në qytetin e Vlorës. Bashkëshorti ka qëlluar për vdekje gruan e tij me thikë, e më pas ka tentuar që të vetëvritet. Viktima mësohet se është 45-vjeçarja Eva Lera, ndërsa autori Teodor Lera, 57 vjeç. Me vrasjen e bashkëshortes Vera Lera, autori ka lënë jetim 3 fëmijë, ndërsa fqinj të çiftit thonë se në shtëpinë e tyre ka pasur shpeshherë raste dhune. Madje, për dhunë në familje, ai ishte arrestuar disa muaj më parë nga policia.
Informacioni paraprak i policisë:
“Sot rreth orës 12:10, në lagjen “Kushtrimi”, në katin e parë të një pallati është gjetur e pa jetë një shtetase 45 vjeçe. Nga hetimet paraprake dyshohet se ajo mund të jetë vrarë nga bashkëshorti. 57-vjeçari më pas, dyshohet se ka prerë damarët. Ai po merr ndihmë mjekësore në Spitalin Rajonal Vlorë. Grupi hetimor vijon punën për sqarimin e rrethanave të ngjarjes”.
Bashkëshortët kanë pasur konflikte të mëhershme, dhe burri ka qenë i proceduar më parë për “dhunë në familje”.
Vrasje e paralajmëruar
Vrasja e gruas në Vlorë ishte një tragjedi e paralajmëruar, ashtu si shumë të tjera që kanë ndodhur në vend. Teodor Lera, 57 vjeç dhe Eva Lera, 45 vjeçe, janë prindër të tre fëmijëve, dy vajzave dhe një djali. Një prej vajzave jeton në Amerikë, djali në Angli dhe vajza tjetër në Tiranë.
Para disa kohësh, çifti Lera përfundoi në polici, pasi Teodori i kishte çarë kokën gruas së tij dhe ishte arrestuar nga forcat e policisë. Por më pas bashkëshortja e tij Eva e kishte falur, dhe ishte ribashkuar me babain e fëmijëve të saj.
