Këshilli i Ministrave miratoi dje vendimin për krijimin e Qendrës për Shërbimet Arsimore.
Në fakt, ajo nuk është tjetër, veçse Agjencia Kombëtare e Provimeve, nga e cila kalojnë të gjithë ata që aplikojnë për në universitete apo ushtrojnë një nga profesionet e rregulluara me ligj.
Prej shtatë vitesh, fokusi i veprimtarisë së saj është organizimi i provimeve të maturës dhe atyre të shtetit.
VENDIMI
Funksioni i QSHA-së është i njëjtë me atë të AKP-së, ndryshon vetëm emri. “QSHA-ja është institucion i posaçëm për organizimin, monitorimin, mbikëqyrjen e problemeve të reformës arsimore, për sigurimin e cilë- sisë në fushën e vlerësimit të arritjeve dhe të provimeve.
Ajo ushtron funksion teknik, profesional, mbështetës dhe rekomandues të politikave të vlerësimit dhe të organizimit të provimeve të maturës e të shtetit”, citohet në vendimin e ri të miratuar një ditë më parë nga qeveria. I shprehur me një gjuhë më të moderuar, edhe roli i Qendrës së Shërbimeve Arsimore, ose ish-AKP-së, është i njëjtë, me përjashtim të kontributit që kjo e fundit duhet të ofrojë në përgatitjen e akteve nënligjore që lidhen me veprimtarinë e qendrës.
Puna e saj përqendrohet kryesisht në realizimin e provimeve kombëtare dhe atyre të shtetit, si dhe raportet vjetore, të cilat është e detyruar t’i publikojë, ndonëse deri më tani AKP ka qenë selektive për shumë prej tyre. Duke qenë se ajo është një ndër aktorët kyç në administrimin e provimeve të maturës, pjesë e veprimtarisë së saj janë edhe trajnimet periodike të personalit që organizon dhe mbikëqyr ato.
Publikimi online i programeve orientuese të maturës dhe për çdo profesion të rregulluar me ligj, është gjithashtu një detyrim, që mund të thuhet se është përmbushur me sukses.
