Më 6 tetor në kafazin e UFC-së do të përballet Conor McGregor dhe Khabib Nurmagomedov, për titullin kampion bote të peshës së lehtë që momentalisht mbahet nga rusi. Presidenti i UFC-së, Dana White është shprehur mjaft i kënaqur me rikthimin e irlandezit në kafaz, pasi sipas tij ai është një figurë që i rrit vlerën këtij edicioni dhe pritet që kjo përballje të thyejë rekorde shikueshmërie e të shitjeve PPV (pay per view-paguaj për ta parë).
Kreu i arteve marciale mikse është shprehur se nuk e shqetësojnë aspak incidentet që Conor shkakton jashtë kafazi, pasi ato e kanë bërë atë një sportist mjaft tërheqës dhe kjo gjë sjell përfitimet e veta.
“Conor punon në mënyrë të jashtëzakonshme me ne, por edhe ne kemi punuar mjaft mirë me të. Ndaj dhe marrëveshjet tona gjithnjë kanë qenë të suksesshme”, u shpreh Dana White. “Zhurma që ai bën ka lezetin e saj dhe ia vlen që të krijojë sadopak rrëmujë, pasi kjo e bën edhe më tërheqës atë si sportist por edhe vetë eventin ku ai merr pjesë.
Njerëzit nuk mërziten aspak nga ajo që ai thotë, ndaj dhe ata e duan. Unë shpresoj të kem sa më shumë sportistë si ai”, u shpreh presidenti i UFC-së, Dana White. McGregor ka deklaruar se ka nënshkruar një marrëveshje me UFC-në edhe për 8 duele të tjera.
