Disa ditë pasi prokurorja Rovena Gashi, e cila ka qenë një ndër figurat më të besuara të ish-Kryeprokurorit Adriatik Llalla bojkotoi procesin e Vettingut, duke mos u paraqitur në seancën dëgjimore, Komisioni i Pavarur i Kualifikimit ka vendosur shkarkimin e saj nga detyra.
“Në përfundim të këtij procesi të rivlerësimit, trupi gjykues vendosi shkarkimin nga detyra të subjektit zonjës Rovena Gashi…Ky vendim mund të ankimohet 15 ditë nga data e njoftimit të vendimit të arsyetuar të komisionit”, tha Genta Tafa Bungo, kryesuese e trupit gjykues.
Gashi, e cila ishte e pezulluar nga detyra për shkak se është nën hetim për fshehje pasurie, refuzoi të paraqitej në seancën dëgjimore të 20 korrikut me arsyetimin se Komisioni e kishte marrë vendimin 8 muaj më parë dhe se procesi ishte i paravendosur.
KPK tha se megjithëse Gashi nuk u paraqit dhe as nuk dërgoi përfaqësuesin e saj në seancën dëgjimore, ky insitutucion e konsideronte të mbyllur atë proces.
Në seancën dëgjimore KPK u shpreh se Gashi ka mospërputhje me deklarimin e pasurisë. “Rezulton se ka mospërputhje mes çmimit për blerje të apartamentit, nuk ka deklaruar burime të ligjshme për këtë blerje, që nga pagesa e parë prej 30 mijë eurosh e më pas edhe për burimin prej 50 mijë eurosh. Sipas KPK-së, janë bërë deklarime të pasakta, janë kryer akte fiktive noteriale dhe janë dhënë përgjigje të pasakta për pyetjet e KPK-së”.
